Virelay 78 : Voist ainsi comme aler porra (DCCLXIII)

Autre Virelay

            Voist ainsi comme aler porra,
            Desconfort soy qui [le] voulra,
            Car je me veil reconforter
            Et de tous mes maulx deporter.

5          Sages est qui ainsi fera.
            Que me vault le desconforter
            Et tristesse en mon cuer porter ?
            Ja mon fait n’en amendera.
            Pour ce veil tout laissier aler,
10        Et parle qui voulra parler.

            Nulz ses torfaiz n’adrecera,
            Maiz cilz qui pacience ara
            En tout ce qui luy avenra,
            Tant qu’il le puist bien endurer,
15        Pourra longues vivre et durer.
            Car qui sueffre en la fin vaincra.

            Comment ose uns homme estriver
            De ce qu’il ne puet amander ?       202b
            Dieux encor l’en acusera.
20        Oultre son vouloir veult ouvrer
            Et par soy ne puet retrouver
            Sans Dieu la perte que faitte a.

            Par faire dueil se destruira
            Et sa vie en abrigera,
25        Par courroux pourra Dieu tourbler.
            Si se fait bon confort donner :
            Aveigne qu’avenir devra.
            Voist ainsi [comme aler porra.]