Virelay 79 : Tout ne me plaist pas ce que j’oy (MCXCVI)

Virelay sur le desplaisir des vices qui regnent au jour d’ui

            Tout ne me plaist pas ce que j’oy,
            Tout me desplaist ce que je voy,
            Tout me trouble mon esperit,
            Tout du present temps se perit,
5          Justice, raison, foy et loy.

            Tout en tristesce et doulour vit,
            Tout vice regne et tout mesdit,
            Tout ne craint pas bien Dieu, ce croy,
            Tout prant, tout excede en habit,  323d
10        Tout veult argent. Ve qui le fit !
            Tout est divisé en recoy.

            Tout n’a point repentence en soy,
            Tout persevere en male foy,
            Tout convoite, tout apovrit,
15        Tout se gaste, tout amenrrit,
            Et quant telz meschiefs apperçoy,
            Tout ne me plaist pas ce que j’oy.

            Tout quiert son singulier proufit,
            Tout bien commun est desconfit,
20        Tout presques puet dire : je doy.
            Tout par terre le ciel pugnit,
            Tout a nostre fait en despit
            Vengence et le souverain roy.

            Tout le clergié vit a desroy,
25        Les chevaliers, peuple : cil troy
            Font la venue d’Antecrit
            Approuchier selon Jhesucrit :
            Et quant plus y pense a par moy
            Tout ne me plaist pas ce que j’oy.