Virelay 71 : En bien sera ma pensee (DCCLV)
Autre Vierlay
En bien sera ma pensee,
C’est le mot qui plus m’agree,
Car des enfance empriz l’ay,
Et pour ce le porteray
5 Tant comme j’aray duree,
Et de cuer l’acompliray.
Car fors que bien ne feray,
De moy yert l’Eglise amee,
Toudiz rayson maintendray,
10 Aux bons me conseilleray. 200c
Vaillance la renommee
Sera de moy honoree
Et Loyauté confortee.
Le bien fait assauteray,
15 Honneur et largesse auray,
Avarice yert reboutee.
En bien [sera ma pensee.]
En tel leesse vivray,
Et loyaument me tendray,
20 Car telle est ma destinee.
De tous faiz d’armes verray,
Cuers estrangiers attrairay,
A tous ces poins mes cuers bee.
De glesve, hache et espee
25 Verray souvent la mellee.
En telz faiz me deduiray,
Et gens d’armes ameray
Plus que creature nee.
En bien [sera ma pensee.]
30 Se paix est, je jouteray
Et feray mener grant glay.
Toute joye yert recouvree,
Les dames assembleray,
Avec elles danceray,
35 Lors sera feste menee.
Et puis une autre journee,
Sera la chasse cornee,
Une autre en riviere yray,
Mes deduis departiray
40 Aux dames par la contree.
En bien sera ma pensee etc.