Virelay 69 : Dame, vostre grant biauté (DCCLIII)
Autre Virelay
Dame, vostre grant biauté,
Vo douçour, vostre bonté
M’ont si ravy,
Que s’Otroy n’a de moy mercy,
5 Je suis gasté.
De trop fort heure vous vy.
Je languy,
Se de moy n’avéz pité.
Car vostre gent corps joly
10 M’a a ly
Attrait, cuer et volenté.
Doulz regart m’a conforté,
Et si m’a espoir porté
Jusques a cy
15 Que Dangier m’a assailly
Et rebouté.
Dame, [vostre grant biauté.]
Bel Acueil, venéz a my.
Vostre amy
20 Se gist moult desconforté.
Par reffus suy mal bailly,
Car failly
Me sont joye et equité.
Je n’ay nulle affinité
25 Que la mort, s’umilité
Que je depry
Ne me rent par son octry
Ressuscité.
Dame, [vostre grant biauté]
30 En moy guermentant ainsy,
J’entroy 200a
Sommillans en ma grieté,
Une voix qui d’umble cry
Et sery
35 Disoit : Je sui Loiauté
Qui te veul rendre santé.
Vy toudiz en seurté,
Ne t’esbahy.
Adonc fu tantost gary
40 Et terminé.
Dame, [vostre grant biauté.]
Je prendray en patience
Ma grevance,
Et soufferray humblement
45 La dolour et le tourment
Que j’ay eu des mon enfance.
Et se Fortune me lance
De sa lance
Despit outrageusement
50 Pour empirer ma constance,
Tel pesance
Porteray pacianment
Et vivray en esperance
Que souffrance
55 Me domra aligement.
Car tousjours honestement.
Veil tenir ma convenance.
