Virelay 67 : Par ma foy, dist Robinette (DCCLI)
Autre Virelay
Par ma foy, dist Robinette,
Je fu mise trop joeunette 199b
Nonnain en religion,
Et pour ce prophession
5 Ne sera ja par moy faite.
Du cloistre me suis retraitte,
Ou l’en doit rendre contrette
Ou corps de rude façon,
Femme borgne ou contrefette,
10 Non pas fille joliete,
Qui scet baler du talon.
Quant je dance a la musette
Du biau Robin qui chevrette
Pour moy d’un si joly son,
15 Quanqu’il fait me semble bon.
Si veil estre s’amiette.
Par ma foy, [dist Robinette.]
Je vi l’autre jour Marette,
Yseut, Margot et Hennette,
20 Qui mengoient du maton
Dessus l’erbe nouvellette,
Et s’i estoit Guillemette,
L’amie du grant Hemon,
Chantans une chançonnette :
25 Dieux ! j’oy la coquelinette,
Dieux, j’oy la coqueluron !
La se print maint bergeron,
Dansant, par fine amouretee.
Par ma foy, dit Robinette.
30 Chascun portoit sa houlette
Et du pain en sa lourette.
Maiz trop fist le compaignon,
A tout sa menue cornette,
Brehiers et pour Marsonnette,
35 Qui li menoit son guaignon.
Adonc, dit Robin la guette, 199c
Li leux noz brebiz aguette :
Ne veéz vous pas le larron ?
Se je ne ray mon baston,
40 La feste sera deffette.
Par ma foy, dist Robinette etc.