Virelay 66 : Et comment me puis je excuser (DCCL)
Virelay 199a
Et comment me puis je excuser
Nullement de cellui amer
Qui sans sejour
M’apelle sa dame et sa flour,
5 Et qui pour moy ne puet durer ?
J’aroye en moy trop grant riguour,
Quant il m’a cuer, corps et vigour
Fait presenter
Et qu’il ne pense par nul tour
10 Fors a moy et a mon atour,
Sanz sejourner,
Se je ne faisoye parler
Octroy pour ly reconforter
De sa dolour.
15 Pour ce a li me doing sans folour
Et le veil mon ami clamer.
Et comment me puis je [excuser ?]
On ne pourroit trouver meillour
Ne plus loial car c’est la tour
20 De bien celler.
Tout bien fait en lui son demour.
Tous moulz het, toute deshonnour,
Et sans cesser
Veult en toute honour labourer,
25 Armes suir, dancer, chanter,
Dont tel tenrrour
Me fait que de grief et d’errour
Le veil a mon pouoir getter.
Et comment me puis je excuser etc ?