Virelay 65 : Et de quoy vous puis je estrener (DCCXLIX)
Autre Virelay
Et de quoy vous puis je estrener,
Ne quel don vous puis je donner
Hui a ce jour,
Dame, fors cuer, corps et amour
5 Que je vous doing sans retourner ?
En vous veul mettre mon labour :
Ma deesse estes que j’aour
Et veil amer.
Or ostéz mon cuer de tristour
10 Et me recevéz, douce flour,
Sanz reffuser,
Ou mon temps me faudra user
En tristesse et desesperer
Sans nul retour
15 Et estre mis au lit de plour,
Sanz jamaiz en pouoir lever.
Et de quoy [vous puis je estrener ?]
Humilité, joye et douçour,
Pitié, courtoisie et honour,
20 A ce mener
Veilliéz [donc], ma dame, et valour
Qu’elle reçoive ma clamour.
Las ! terminer
Fera mon mal et remuer,
25 Et si me fera relever
De ma langour,
Et vivre en joye et en baudour,
Pour li mieulx ous temps honorer.
Et de quoy [vous puis je estrener ?]