Virelay 64 : Bien doy faire lie chiere (DCCXLVIII)
Virelay
Bien doy faire lie chiere
Quant ma douce dame chiere
A pité de my
Tant qu’elle m’appelle amy
5 De cuer, par bonne maniere.
Cent mille foiz l’en gracy
Et mercy,
Car j’ay de faire matiere
Tous biens pour l’amour de ly,
10 Cuer joly,
Quant porter ly voy banniere
D’onneur, et que la premiere
Festoie gent estrangiere
Et honoure si
15 Qu’il n’est dame, Dieu mercy,
Qui tant de los en acquiere.
Bien doy [faire lie chiere.]
Gent corps et noble et poly,
Voix aussy,
20 Chant n’est qui a li s’affiere,
Oncques tel douçour n’oy.
Resjoy
M’a de beauté la lumiere.
C’est ma dame singuliere,
25 Especial, derreniere, 198d
Que sur toutes cry.
C’est celle a qui je m’ottry.
Bouter ne me veille arriere.
Bien doy faire lie chiere.