Virelay 62 : Je vous ay long temps amee (DCCXLVI)

Virelay

            Je vous ay long temps amee
            Pour vo bonne renommee,
            Tant que cuer et corps
            Et m’amour avéz des lors,
5          Ma chere dame honoree.

            Estrangiers, venus de hors
            Suy pour veoir vos depors
            Et vo face coulouree,
            Pure comme li fins ors,
10        De douceur li vraiz tresors,
            D’umilité esprouvee,

            Fleur sur toute autre loee,
            De beauté enluminee,
            D’onnour li droiz pors
15        Et de bonté li rappors
            Qui m’a la oculour muee.
            Je vous ay [long temps amee.]

            Las ! ce m’est grans desconfors     198b
            Dont je sui a demi mors
20        Que ne savéz ma pensee.
            Or est mes langaiges fors,
            Le vostre m’est vray confors
            Et plus doulz que miel en ree.

            Ja n’aray mal la journee
25        Que vous aray regardee,
            Maiz aray joieux ennors,
            Car m’amour et mes ressors
            Sont en vous, tresbelle nee.
            Je vous ay [long temps amee.]