Virelay 60 : Pour coustume entretenir (DCCXLIV)

Autre Virelay

            Pour coustume entretenir,
            Combien que raison n’y ay,
            Voiz au boiz, ce jour de may,          197d
            Et si ne le doy queillir,

5          Quant j’ay le doulz souvenir
            Du meilleur et du plus vray,
            Le plus gent en maintenir,
            Le plus doulz et le plus gay
            Qui puist vivre ne morir,
10        Qui loing est, et si ne say
            Quant je le pourray veir.
            Et nonpourquant je faindray :
            Pour coustume [entretenir.]

            Je n’ay joye ne plaisir,
15        Bien croy que je languiray.
            Lasse ! ce me fait desir.
            Jamaiz lie ne seray
            Tant que lui que je desir
            A bien retourner verray.
20        Car il a plus a soufrir
            Cent mille foys que je n’ay.
            Pour coustume entretenir.

            Comment me poy je assentir
            Au depart ? Pourquoy donnay
25        Le congie du departir ?
            Trop folement en ouvray,
            Si m’en fault plaindre et gemir
            Et avoir dueil et esmay,
            Craindre, plorer et fremir.
30        Maiz je dissimuleray.
            Pour coustume entretenir etc.