Virelay 45 : Me doy je bien guermenter (DCCXXIX)

Autre Virelay

            Me doy je bien guermenter 194b
            Quant je n’ose regarder
                        D’un seul regart
            Ma dame qui se part
5                      De mon penser,
            Dont trop me fait endurer,
                        Se Dieu me gart ?

            Car soir et main, tempre et tart,
            Me fait par son tresdoulx art
10                    A li penser
            Vray desir qui me depart
            Bon espoir, et d’autre part
                        Paour doubter
            Me fait et honte celler,

15        Que de m’amour reveller
                        Soye couart.
            C’est ce qui me frit et art,
            Pour mieulx garder
            Son honour et moy navrer
20                    Plus de son dart.
            Me doy je bien [guermenter.]

            Mon cuer est en tel essart,
            Que tout se mine et essart
                        D’ymaginer.
25        Dont se savoir puet le quart
            Des maulx qu’elle me [de]part,
                        Pitéz miner
            Fera tost et encliner

            Son[1] cuer et droit cheminer
30                   A son depart.
            Car par son tresdoulx espart
                        Puet terminer
            Mal en bien et dueil finer,
                        Si n’ay regart.
35        Me doy je bien guermenter etc.

[1] Ms. Con