Virelay 44 : Plus vert que nulle verdure (DCCXXVIII)

Autre Virelay

            Plus vert que nulle verdure
            Est mon cuer qui tant endure
                        De dolour
                        Chascun jour
5          Pour vous, douce creature.

            Mais[1] parti d’autre coulour
                        En honnour,
            De loyauté fine et pure :
            C’est de bleu, et la verdour,           194a
10                    Sans folour,
            Y sera tant que je dure

            Pour servir sans mespresure
            Vostre tresdouce figure
                        Que j’aour.
15        Car meillour
            Ne fourma oncques Nature.
            Plus vert [que nulle verdure.]

            Vous estes la droite flour
                        De valour,
20        Et toute ma nourreture.
            Ruissiau de toute douçour,
                        Ma langour,
            Si vous plaist, prenéz en cure,

            Muéz en vo pourtraiture
25        La pierre et la durté dure
                        Qui en plour
                        Par tristour
            Me met en desconfiture.
            Plus vert [que nulle verdure.]

30        Et je veu a bonne amour,
                        Sans demour,
            Qu’a tousjours ma vesteure
            Sera et tout mon atour,
                        Sanz faulx tour,
35        Cert et bleu, je le vous jure.

            Et si querray aventure
            Et me garderay d’injure
                        Faire pour
                        La paour
40        De vous que j’ain sans laidure
            Plus vert [que nulle verdure.]

[1] Ms. Mame