Virelay 43 : Bien doy faire tristement (DCCXXVII)

Virelay

            Bien doy faire tristement
            En dueil et dolentement
                        Mon temps user,
            Quant je me voy reffuser
5                      Presentement
            Par un mot trop simplement,
                        Dire ou mander.

            Las ! qui le me fist penser ?
            Folour, qui desesperer
10                    Fait telement
            Mon cuer et en plour muer 193d
            Que je ne me puis saouler
                        D’estre dolent.

            Car ma dame nullement
15        Ne daigne amoureusement
                        A moy parler,
            Maiz me fait partout blasmer
                        Si durement
            Qu’en moy n’a fors que tourment
20                    Dur et amer.
            Bien doy [faire tristement.]

            Or veil Pitié reclamer
            Qu’elle veuille demander
                        Piteusement
25        Merci et grace rouver,
            Tant que je puisse trouver
                        Pardon briefment

            Vers ma dame. Et vrayement
            A son doulx commandement
30                   Veil amender
            Le meffait et moy garder
                        Si fermement
            Que tousjours par son commant
                        Vouldray ouvrer.
            Bien doy [faire tristement.]