Virelay 38 : Plus dure que fers ne fus (DCCXXII)

Autre Virelay

            Plus dure que fers ne fus,
            Prier ne vous ose plus,
                        Dont je me dueil,
            Quant en vous voy bel acueil
5                      Plain de reffus.

            Vo parler, vo riant œil
            Me rendent plus que ne seu[i]l
                        Mat et confus.
            Car cent mille maulz requeil
10        Sanz nul bien, dont j’ay tel dueil
                        Que Pirramus

            N’ot si grant ne Thezeus,
            Erculés ou Narcisus  192c
                        Par son orgueil :
15        Pour ce Equo nommer vous veil
                        Comme esperdus.

            Comment m’a vostre doulz ueil
            Ainsi fait passer le sueil
                        Des confondus ?
20        Quant desir en regart queil
            Durté vient, dont je me meil
                        Plus qu’Alpheuz

            De plorer, si qu’a Venus
            Suppli d’estre secourus
25                    Par son esveil.
            Car, ce[1] n’est pas son traveil[2],
                        Je suis perdus.
            Plus dure que fers ne fus etc.

[1] Saint Hilaire corige en se

[2] Ms. travail