Virelay 37 : J’oy la voix du martir d’amours (DCCXXI)

Autre Virelay

            J’oy la voix du martir d’amours
            Qui ne pourroit plus endurer
            Sans mort ou sans desesperer.
            Doulz espoir, va, faiz li secours.
5          Di li qu’i[1] ne se doit doubter,
            Maiz doit son cuer reconforter.      192b

            J’ay oy ses humbles clamours,
            Son plait, son gemir, son plourer,
            Qu’il a fait. Si doit esperer
10        Que briefment verra ses bons jours.
            Car, aprés ses dures dolours
            Ly feray mille biens doubler
            Et pour dueil joye recouvrer.
            A deduit sera ses recours.
15        J’oy la voix [du martir d’amours.]

            L’en ne puet l’or mieulx esprouver
            Que cilz est, ne plus fins trouver,
            Car il a tant souffert d’ardours,
            De froit, de chaut, de dur penser,
20        De faulz rappors, que nulz durer
            Ne pourroit en telles langours.
            Maiz c’est la flour de toutes flours,
            Qui pour iens ne se veult muer.
            Si li octroy pour amer
25        Leesse et ris en lieu de plours.
            J’oy la voix [du martir d’amours etc.]

[1] Saint Hilaire corrige en qu’il