Virelay 36 : Pour ma douleur assouagier (DCCXX)

Virelay            192a

            Pour ma douleur assouagier
            Qui me fait chascun jour languir
            Veul faire d’un doulx souvenir,
            Dame, mon loyal messagier.

5          Car je n’ose aler ne venir
            Vers vous que j’ain d’ardent desir.
            Pour Mesdit le faulx losengier,
            Et pour Honour qui retenir
            Veult de tout blasme sanz mentir
10        Amie et amant. Maiz Dangier
            Fait souvent mon cuer lesdengier,
            Plaindre, plourer, craindre et fremir,
            Refuser, complaindre, gemir.
            Or le me veulléz estrangier
15        Pour ma dolour [assouagier.]

            Sur toutes autres vous desir
            Tant que je seray vray martir
            En amours, sanz plus atargier,
            Qui me fait sans espoir perir,
20        Dieu le veulle a Amour merir,
            Car je ne m’en puis revengier.
            Las ! je pers le boire et mengier.
            Pour Dieu veulléz moy secourir,
            Ma dame, ou il me fault mourir.
25        Faictes moy ma vie eslongier.
            Pour ma douleur assouagier etc.