Virelay 35 : Se j’ay amé longuement (DCCXIX)

Autre Virelay

            Se j’ay amé longuement[1]
            De vray cuer et bonnement
                        Mon doulz ami,         191d
            Et il s’est retrait de mi
5                      Soudainement,
            Sanz cause et sans mouvement,
                        Amours regni.

            Car je l’ay long tempsservi,
            Amé, doubté et chery
10                    Tresloyaulment
            N’onques a autre qu’a ly
            Mon las cuer ne s’assenty
                        Aucunement.

            Et je voy tout clerement
15        Que malicieusement
                        M’a deguerpy
            Et qu’il a amours choisi
                        Nouvellement,
            Sanz dire au departement :
20                    Adieu vous dy.
            Se j’ay amé [longuement.]

            Et pour ce l’eure maudy
            Qu’amours en moy s’emvaty
                        Premierment,
25        Et les yeux dont je le vy
            Et moy quant mon cuer ravi
                        Si folement :
            En amours n’a que tourment.
            A Dieu du tout le commant
30                   Des ce jour cy.

            De moy n’ot onques mercy
                        Certainement,
            Ainçoiz m’a couvertement
                        Le cuer ocy.
35        Se j’ay amé longuement,
            De vray cuer et bonnement etc.

[1] Ms. longuemement