Virelay 33 : Certes, je croy que plaisance (DCCXVII)

Autre Virelay

            Certes, je croy que plaisance,
            Doulx penser et souvenance
                        Puet homme garir
            De tous maulx et de morir,
5          Puis qu’il a bonne esperance.

            Car plaisance, a dire voir,
            Puet tous meschiefs remouvoir,
                        De cuer, de vaillance.
            Souvenir li fait avoir
10        Doulx penser et bon espoir
                        A tout ce qu’il pense.

            Lors n’i fault que diligence
            Avoir et ferme creance
                        Et bien poursuir,
15        Soy taire, humblement souffrir,
            C’est ce qui pluseurs avance.
            Certes, je croy [que plaisance.]

            Bien m’en puis apercevoir,
            Qui Fortune decevoir
20                    Volt par sa grevance
            Tant que j’en dui recevoir
            Peril de corps ou d’avoir
            Par son inconstance.

            Maiz ma grant perceverance,
25        Mon plaisir, ma pacience,
                        Mon noble desir
            A celle qu’ayn et desir
            M’on rendu ma delivrance. 191c
            Certe, je croy que plaisance etc.