Virelay 27 : Dame, je vous remercy (DCCXI)

Virelay

            Dame, je vous remercy
                        Et gracy
            De cuer, de corps, de pensee,
            De l’anvoy qui tant m’agree
5                      Que je dy
            C’onques plus biau don ne vi
            Faire a creature nee,
            Plus plaisant, ne plus joly,
                        Ne qui sy
10        M’ait ma leesce doublee.

            Car du tout m’a assevi,
                        Et ravi
            En l’amoureuse contree.
            Je le porte avecques my
15                    Con cellui
            Qui m’a joye recouvree,
            Et si m’a renouvellee
                        M’amour qui
            Mancoit par rappors hays
20        Et par fausse renommee.
            Dame, je vous remercy etc.

            Long temps a mon cuer gemy
                        Et fremy
            En doleur despesperee,       190a
25        En tristesse et en soucy,
                        Jusqu’a cy
            Que Pitéz est devalee,
            Qui a des loyaulx mercy.
                        Or li pry
30        Que ne croye a la volee
            Fausse langue envenimee,
            Car par lui
            Sont maint loyal cuer trahy.
            De mal feu soit embrassee[1] !
40        Dame, [je vous remercy.]

[1] Saint Hilaire corrige en embrasee