Virelay 26 : Faictes bonne chiere et lie (DCCX)

Autre Virelay 189c

            Faictes bonne chiere et lie,
            Gens d’armes de Normandie,
            Car le roy est en bon point,
            Et priéz Dieu qu’il lui doint
5          Paix, honnour et bonne vie.

            Mettéz en sa seignourie
            Rebellion la haye
            Qui d’estre amie se foint
            Par semblant d’ypocrisie,
10        Pour chassant mort par envie,
            Et plus qu’escorpion point

            Du venin de felonnie,
            Par la queue oultrequidie,
            Dont le chief blandit et oint
15        Son vray seigneur et l’empoint
            Jusqu’a mort, par sa folie.
            Faictes bonne chiere [et lie.]

            Maiz Dieux ne soufferroit mie
            Raisons ne droiz qu’impugnie
20        Demourast, car le bien voint.
            Et pour ce sera pugnye
            La fausse comme ennemye.
            Tel crime ne li pardoint

            La noble et roial lignie,
25        Maiz applique a sa partie,
            La terre et ce qui y joingt,
            Comme forfait et adjoint,
            A li par la renoye.
            Faictes bonne chiere et lie etc.

30        De noble chevallerie,
            Fleur de toute baronnie,
            Prouesse et honnour vous point.
            De[1] bon roy vous a nourrye,           189d
            Rendéz lui la courtoisie,
35        Eins ne vous fist mal apoint,
            Force et pitéz vous escrie,
            Amour, loyauté vous prie,
            Et raisons si vous enjoint
            Que loyal, ferme et conjoinct
40        Ly soyéz sans departe.
            Faictes bonne chiere et lie etc.

[1] Saint Hilaire corrige en Se