Virelay 25 : Il me devroit [bien] souffire (DCCIX)

Virelay

            Il me devroit [bien] souffire           189b
            Se ma dame, que Dieu gart,
            Le voit vers moy son regart
            Bonnement, sanz escondire.
5          En mieulx ne pourroye eslire
            L’amour qui me frit et art.

            Endurer veuil mon martire,
            Veulle ou non, sans escondire
            Se je puis et tempre et tart
10        Tant qu’elle me deingne dire :
            Amis, ostéz vo cuer d’ire,
            C’est le meilleur, car l’espart

            Est en vous qui vous martire
            D’amours par son tresdoulz art
15        Qui chaut et froit me depart,
            Maiz il me sera bon mire,
            Lors diray : ― Dieux le vous mire
            Qu’espoir aray de ma part.
            Il me devroit bien souffire etc.

20        Je fonderay comme cire
            S’espoir vers moy ne se tire.
            Maiz de requerre couart
            Sui et ne vous ose escripre
            Comment paour me fait frire,
25        Et Dangier qui me repart

            En pensant triste m’atire,
            Dont, se vous n’avéz esgart
            De pité, povre musart
            Me pourray partout descripre.
30        Or ne veuilliéz escondire
            Le cuer ou le vostre part.
            Il me devroit bien souffire etc.