Virelay 24 : Pour fuir l’epidimie (DCCVIII)
Autre Rondel[1]
Pour fuir l’epidimie,
Reboutéz merencolie,
Vivéz liement
Et faictes departement
5 Du lieu ou elle est fichie[2].
Aléz en esbatement
Au bon aire premierement. 189a
Buvéz bon vin une fye.
Et se l’air est grossement
10 Ordonné et tourblement,
Soit vostre chambre garnie
De bon feu, car c’est folie
D’issir par tel punaisie.
Soiéz diligent
15 D’avoir o vous lie gent,
Et menéz joyeuse vie.
Pour fuir [l’epidimie.]
Ayéz drap souef flairant
Ou autre chose qui rent
25 Bonne odeur et puriffie
L’air mauvaiz non compettent,
Et vous tenéz nettement
De conscience, non mie
D’orgueil ne de villenie.
30 Et qui a dame et amie
Voist joyeusement
Vers lui et tresloyaulment
L’aint sanz y penser folye.
Pour fuir [l’epidimie.]
35 Qui fera si faittement,
Maiz qu’il vive nettement
De bonne poulallerie,
D’une perdiz, d’un faisant,
D’un connin frez et plaisant,
40 Non pas viande pourrie,
Et que son vin modifie
Un petit, je ne doubt mie
Que legierement
Ne puist passer le tourment
45 De celle mort tant haye
Pour fuir [l’epidimie.]
[1] Saint Hilaire corrige en Virelay
[2] Ms. fichee