Virelay 15 : Tout cuer triste et dolereux (DLXIX)

Autre Virelay

            Tout cuer triste et dolereux,
                        Amoureux,
                        Langoureux,
            Mettéz vous soubz ma banniere,
5          Et alons queillir bruiere.

            Car may ne m’est pas joyeux.
            Je desir lieux tenebreux,
                        Estre seulz
            Sans clarté et sans lumiere,
10        Quant je sui par envieux
                        Comme un leux
            Chasséz en mainte maniere
            Du plaisant lieu gracieux,
                        Savoureux,
15                    Et par ceulx
            Qui me monstrent belle chiere.
            Dont je dy, comme honteux.
            Tout cuer [triste et dolereux]

            My penser son perilleux
20                    Et doubteux.
            Tristeur n’est que je [ne] quiere,
            Desconfortéz, maleureux,
                        Onques n’eux
            Si dolereuse matiere.
25        S’en sui merencolieux,
                        Desireux :
                        Deux a deux,
            Les puisse veoir en biere,
            Quant vestir noir drap de liere
30        Me font les foux outrageux.
            Tout cuer triste et dolereux.          177a