Virelay 3 : Sui je, sui je, sui je belle (DLIV)
Virelay
Sui je, sui je, sui je belle ?
Il me semble, a mon avis,
Que j’ay beau front et doulz viz
Et la bouche vermeillette.
5 Dittes moy se je suis belle.
J’ay vers yeulx, petit sourcis,
Le chief blont, le nez traitis,
Ront menton, blanche gorgette.
Sui je, sui je, sui je belle ? etc.
10 J’ay dur sain et hault assis,
Lons bras, gresles doys aussis
Et par le faulz sui greslette.
Dittes moy se je sui belle.
J’ay bonnes rains, ce m’est vis,
15 Bon dos, bon cul de Paris,
Cuisses et gambes bien faictes.
Sui je, sui je, sui je belle ? etc.
J’ai piéz rondés et petiz,
Bien chaussans, et biaux habis,
20 Je suis gaye et joliette.
Dittes moy se je sui belle. 174a
J’ay mantiaux fourréz de gris,
J’ay chapiaux, j’ay biaux proffis
Et d’argent mainte espinglette.
25 Sui je, sui je, sui je belle ?
J’ay draps de soye et tabis,
J’ay draps d’or et blans et bis,
J’ay mainte bonne chosette.
Dittes moy se je sui belle.
30 Que .xv. ans n’ay, je vous dis.
Moult est mes tresors jolys,
S’en garderay la clavette.
Sui je, sui je, sui je belle ?
Bien devra estre hardis
35 Cilz qui sera mes amis,
Qui ara tel damoiselle.
Dittes moy se je sui belle.
Et par Dieu je li plevis
Que tresloyal, se je vis,
40 Li seray, si ne chancelle.
Sui je, sui je, sui je belle ?
Se courtois est et gentilz,
Vaillans aprés, bien apris,
Il gaignera sa querelle.
45 Dittes moy se je sui belle.
C’est uns mondains paradiz
Que d’avoir dame toudiz
Ainsi fresche, ainsi nouvelle.
Sui je, sui je, sui je belle ? etc.
50 Entre vous acouardiz,
Penséz a ce que je diz :
Cy fine ma chasonne[tte].
Sui je, sui je, sui je belle ?
