Virelay 2 : Qui puet avoir plus grant rage (DL)

DL. Qui puet avoir plus grant rage
Virelay

            Qui puet avoir plus grant rage
            Ne doleur plus dolereuse
            De perdre en vie amoureuse
            Veoir, l’aler, doulx langage ?
5          Certes nulz. Trop perilleuse,
            Est[1] a homme et trop doubtouse[2]

            Amour qui a tel usage.
            Car l’alee est precieuse,
            Parole delicieuse,
10        Et le veoir assouage.

            Maiz quant ce faut, cuers enrage :
            Desirs, pensee envieuse
            D’avoir la vie joyeuse
            Mue en tristour le corage.
15        Qui puet avoir plus grant rage ?

            Ceste vie merveilleuse        173c
            A mes cuers et maleureuse,
            Dure, dolente et sauvage,
            Par[3] Fortune l’orguillouse[4].
20        Voye me tost et passage.

            Certes donc[ques] languiray je
            En ceste vie ploureuse,
            Desplaisant et langoureuse,
            Puis qu’ainsis suis mis en cage.

[1] Ms. Cest

[2] Saint Hilaire corrige en doubteuse

[3] Saint Hilaire corrige en Car

[4] Saint Hilaire corrige en orguilleuse