Rondeau 60 : Bien m’a Amour prins au saut de la pye (DCXXII)
Autre Rondel
Bien m’a Amour prins au saut de la pye
Soudainement, en passant mon chemin,
Par un regart ou je congnoiz ma fin.
Ce fu dame joeune, cointe et jolye,
5 Douce et plaisant, qui a cheveux d’or fin :
Bien m’a Amour [prins au saut de la pye
Soudainement, en passant mon chemin.]
Donné li ay cuer, corps, pouoir et vie,
A son vouloir sui et seray enclin :
10 Or ne le scet, maiz puis que pour li fin,
Bien m’a Amour [prins au saut de la pye
Soudainement, en passant mon chemin,
Par un regart ou je congnoiz ma fin.]