Dit 32 : Chevaliers en ce monde cy (MCCCCLIV)
Les estas du monde
1 Chevaliers en ce monde cy
2 Ne peulent vivre sanz soucy :
3 Ilz doivent le peuple deffendre
4 Et leur sang pour la foy espandre.
5 Juges subject, juges royal
6 Doivent estre ferme et loyal
7 Et juger a droicte balance
8 Povre et riche en equipolance.
De ceuls qui ont serviteurs
9 Comme chascun soit a l’ymaige
10 Creéz de Dieu, cilz fait que saige
11 Qui servis est de creature,
12 Se bien lui paie sa droiture.
De ceuls qui euvrent a journee
13 Cilz doit bien son corps emploier
14 Qui journoye et qui prant loier,
15 Qui fouit ou fait euvre en terre[1],
16 Car au soir va son louier querre.
Des hostelliers
17 Hostelains doit avoir desir
18 De faire a ses hostes plaisier
19 Et eulx garder com sa personne
20 Et procurer viande bonne.
Des armeuriers
21 Armoier qui fait haubergond
22 Et harnois doit estre preudoms,
23 Car soubz la fiance de lui 443c
24 Combatent pluseurs a autrui.
Des marchans
25 Marchant qui vend sa marchandise
26 Se gard de male couvoitise,
27 Vende, gaingne selon droiture,
28 Sanz comettre pechié d’usure.
Des phisiciens
29 Tu qui te faiz phisicien,
30 L’autre qui se fait ciurgien,
31 Bon est que chascun s’estudie
32 A bien curer la maladie.
Des conseilliers
33 Qui conseille, si ait advis
34 Qu’en couvoitant ne soit ravis,
35 Ne pour faveur ne subvertisse
36 Le droit dont la cause perisse.
Des notaires
37 Notaires qui instrumens fais,
38 Tu doiz estre loyaulx en fais,
39 Entendre et justement escripre,
40 Si c’om n’y puist ton blame dire.
Des mareschaulx
41 Adviser se doit mareschal[2]
42 Qui ferre d’autruy le cheval,
43 Car par l’enclouer ou retraire
44 Puet trop le maistre avoir contraire.
Des barbiers
45 Secréz doit estre li barbiers
46 Dessus tous les autres mestiers :
47 Pluseurs secréz voit de nature
48 Qu’om ne doit dire a creature.
Des serviteurs
49 Qui sert ait en soy pacience,
50 Humble cuer, bonne conscience,
51 Et gart le proufit et l’onnour 443d
52 En trestous lieux de son seignour.
De ceuls qui s’asservissent
53 Cilz qui a asséz de quoy vivre
54 Est fouls puis qu’a servir se livre,
55 Car en couvoitant s’asservit.
56 Mais cilz est franc qui du sien vit.
Des laboureurs
57 Le peuple si doit labourer,
58 Dieu servir, l’eglise honourer
59 Et espargnier de son labour
60 Pour les nobles vivre a honour.
Des prelas
61 Les prelas et les gens d’eglise
62 Doivent vers Dieu faire servise
63 Et prier pour le peuple humain
64 Qui leur met le vivre en la main.
De ceuls qui servent
65 Homme qui se met a servir
66 Se doit tellement asservir
67 Et faire sa franchise serve
68 Que son seigneur loyaument serve.
Des advocas
69 Je ne sçay en ce monde cas
70 N’estat si seur com[3] d’avocas :
71 On les quiert, ilz ne quierent pas,
72 Et si vivent d’autrui debas.
De ce mesmes
73 Estat d’avocat est doubteus
74 Pour l’ame, s’il es couvoiteus.
75 Saiges, preudoms et diligens
76 Doit estre, et aider povres gens.
D’abregement de vie.
77 Le trop disner et tost dormir aprés,
78 Souper de nuit, suir le mestier fres,
79 […][4]
80 Sanz apetit vin boire a [tres]grans tres 4444a
81 Couchier [en] bas, estre fel et engrés
82 Tuent pluseurs que la mort suit de pres.
De continuer sa santé
83 Lever matin et prandre esbatement,
84 Entendre au sien et vivre sobrement,
85 Courroux fuir, souper[5] legierement,
86 Gesir en hault, dormir escharsement
87 Loing du mengier, soy tenir nettement
88 L’omme enrrichit, et si vit longuement.
[1] Ms. ou qui fait courage
[2] Ms. le mareschal
[3] Ms. comme
[4] Vers manquant
[5] Ms. et souper