Dit 31 : L’an de la grant division (MCCCCXLVI)

Prophecie
1                      L’an de la grant division,
2                      A trois ans, de mutacion
3                      De tous les estas de ce monde,
4                      Par effects, par signes se fonde,                                                        441d
5                      Par perseverance en tout vice :
6                      Ne fera foy, loy ne justice,
7                      Charité, pitié ne raison,
8                      Amour n’aumosne n’oroison.
9                      Terre donnra po et mal fruit,
10                    Et maint regne seront destruit.
11                     Mortalitéz, fouldres soudaines,
12                     Pluies de sang seront prochaines,
13                     Guerres d’amis et de prochains,
14                    Famines, hullemens et plains,
15                    Les chiefs bleciéz, les membres rous,
16                    Envies, haines, courrous,
17                     Couvoitises desordonnees
18                    En tous peuples par pechiéz nees
19                    Et dissimulacions faintes,
20                    Toutes vertus presques estaintes,
21                     En Europe, en Aufrique, en Aise.
22                    Se Dieux vers nous ne se rapaise,
23                    Seront selon les prophecies
24                    Mutacions de monarchies,
25                    Et du fil de perdicion
26                    Venue est preparacion
27                    Et l’approuchement de la fin :
28                    Tesmoing d’un d’eulx est Jouachin,
29                    Metheode secondement,
30                    Se leur espriture ne ment.