Dit 25 : A noz Gilbertins, frequentans (MCCCCXVIII)
Autres lettres du pays de Brie envoyees aux compaignons de Crespy, et premier la superscripcion
1 A noz Gilbertins[1], frequentans
2 A Crespy passé a cent ans.
3 Treschier especial ami,
4 Vueilléz avoir pité de mi.
5 Le corps me rompt, le cuer me crie,
6 Quant je pense au pays de Brie :
7 Durs vins y a, neant charnus,
8 Aspres de goust, de liqueur nus,
9 Buche vert sanz famble, qui fume,
10 Et froide chambre qui enreume
11 Le chief par le plastre nouvel,
12 Dont je ne suis pas en revel.
13 Cure n’ay plus de pais vert
14 A Brie [le] conte Robert,
15 De Gournay ne de La Ferté.
16 Ce n’est pais que pour esté.
17 Il n’y a rien plus froit que l’astre
18 Excepté le mortier de plastre
19 Ou on entre jusqu’aux genoux
20 Toutefoiz que le temps est moulx.
21 La boe y est touz les matins,
22 Usé y ay mes espatins
23 Par defaulte de pavement. 428b
24 Je n’eus onques tant de tourment.
25 Et s’ont Brioys trop langaige
26 Pour un pou de meschant frommaige
27 Qui ne puet ou pais pechier,
28 En disant que chascun l’a chier.
29 Mais qu’a nul facent compaignie
30 Ceuls du pais, je le vous nie :
31 Ilz sont en leurs bois comme leux,
32 Et m’ont laissié disner tous seulx
33 Comme mastin en une grange.
34 Mais compaigné m’ont li estrange
35 Qui ont parti a mon levain,
36 Et se j’ay traveillié en vain
37 Ou joué a eulx de mes tours,
38 Dieux le scet, car si fors estours
39 Leur ay moustré au departir
40 Que li aucun en sont martir,
41 Qui seuffrent oultre conscience
42 Trop dolereuse pacience.
43 O noble pays de Valloys !
44 Crespy cy aux gentilz galoys,
45 Aux bons buveurs, aux frequentans,
46 Je ne vous vis il a cent ans !
47 Villouart et Gautier l’Abbé,
48 Hebert, Arnoul, suy je gabé ?
49 Adenin, Philpot[2] de Sermoise,
50 Je ne fuis puis mon depart aise !
51 Jehan Boileaue, Phelipe Barbette,
52 Jehan Daciot qui est en debte
53 Du fait de la Gi[lle]bertine !
54 Et Crespy, cité noble et digne
55 A tous tes nobles citoiens !
56 O tu, [o] tresnobles doyens
57 De Saint Thomas, tout est gasté, 428c
58 Ton povre moine [n’a] pasté,
59 Qui a delessié sa pasture !
60 In n’avoit de la c’une cure.
61 Il est de froit a moitié mors,
62 Il a bonne ame et chetis corps,
63 Et dit en regretant : ― Hé my !
64 Pour quoy laissay je onques Crespy
65 Pour le froit pais frequenter ?
66 Le diable m’a voulu tempter
67 Qui, compaings Jaquet, Mesgremain,
68 Je vous sueil veoir soir et main.
69 Mais vous m’estes trop eslongniéz,
70 Je suis malement engigniéz :
71 Priéz pour moi, je vous en prie,
72 Car j’ay esté martir en Brie.
73 Dieux m’en doint a bien retourner,
74 Car jamais n’y pense atourner.
75 Hé ! Flament, Borgne de Sery,
76 Monrecourt, le petit Douy,
77 Le grant, et Regnault le Portier,
78 Que fussiéz vous en un mortier
79 Tel comme je l’ay chascun jour
80 Deléz moy pour faire sejour
81 Et pour vostre corps deporter !
82 Huy m’est venu reconforter
83 Li doulz, li courtois, li jolis
84 Craille, receveur de Saint Lis
85 A mon assise de Gournay.
86 De la alons a Espargnay
87 Et a ces bons vins de Vertus.
88 Je ne prise mais .ii. festus
89 Brie ne toute sa puissance.
90 Je vous pri, aiéz remembrance
91 De moy qui veoir vous desir,
92 Et si vueilléz prandre loisir 428d
93 Vous tous de vous ensemble mettre
94 Pour lire ma petie lettre
95 Et pour avoir de moy memoire.
96 Et je pri au doulz Roy de gloire
97 Qu’il vous doint paix et bonne vie,
98 Suffisante et vous gart d’envie,
99 Et autant de bien et de joye
100 A tous que pour moy en vouldroye.
101 Mes seigneurs et mes amis doulz,
102 Je me recommende a vous touz
103 Tant que je puis et que je sçay.
104 Chantéz et soiéz tous jours gay
105 Si comme il est accoustumé !
106 Escript d’un visaige enreumé,
107 Les piéz frois, a Macy le Meindre,
108 Le .xxiiiie. jour de decembre
109 A Gournay au departement
110 Ou sus bumes legierement.
111 Et si me saluez Colette,
112 Qui me nourrist et qui m’alette
113 De son let que boute[3] nourrisse,
114 Afin que mes corps n’apovrisse.
115 Le maistre de Gillebertine
116 Qui use de vostre dotrine.
[1] ms. gillebertins
[2] Ms. phelipot
[3] Raynaud corrige en bonne
