Dit 26 : A gens de grant discrecion (MCCCCXIX)
Autre lettres envoiees a mes seigneurs de la Chambre des Comptes disnans en l’ostel de Sire Guillaume Brunel, tresorier de France
[2 décembre ? ? ?]
1 A gens de grant discrecion,
2 Usans en consolacion
3 Comme freres sanz nulle envie
4 En ce monde leur mortel vie
5 En commune fraternité,
6 Par le livre d’eternité
7 Ou mondainement pardurable, 429a
8 Ou du moins par long temps durable,
9 Precieux comme le fin or,
10 Commencé par ceuls du Tresor
11 Et par les seigneurs anciens
12 Qui ne pensoient qu’a toyz biens
13 Qui nous sont par leurs sens venus,
14 Dont les beaux diners sont tenus
15 Par un chascun selon son ordre.
16 Par le saint libre, qui estordre
17 Ne puet a ceuls du saint College
18 Dont Guillaume Brunel s’alege
19 Au jour d’ui, si commr j’entens,
20 Ou je vouldroie estre presens
21 Pour oir le sarmon divin
22 Qui se fait par force de vin,
23 De char et d’autre sacrifice
24 Par cellui qui en a l’office,
25 Ou le livre est auctorisé
26 Et a l’onneur moralisé
27 Des recumbens qui la s’assemblent,
28 Qui aux bons apostres ressemblent,
29 En tant c’un couraige et un cuer
30 Ont et gettent discorde fuer,
31 Et prins amours comme benignes,
32 Je, povres pecheurs [et] indignes,
33 Frere Eustace d’umilité,
34 Qui desir vostre affinité
35 Et vostre sauvement mondain,
36 Ne veuilléz avoir en desdain,
37 Honeur, vertu, joie mondaine
38 Et toute floire souveraine,
39 Humble recommendacion
40 Et toute vraie affection !
41 Treschiers et reverens seignours, 429b
42 Je desir sur tous mes labours
43 Que vous me faciéz ceste grace
44 Que me donnéz temps, lieu et place
45 Que devant vous puisse preschier.
46 Si ne me vueilléz empeschier
47 En ce fait ne moy escondire,
48 Car plusuers poins vueil contredire
49 Que aucuns ont contre la foy
50 Publiéz et semez, ce croy,
51 Si comme l’en me donne entendre,
52 Desquelz je les vouldray reprandre
53 Et corrigier pour leur erreur
54 Qu’ilz ont semee par foleur,
55 Comme non saichans et novices.
56 Maistre Martin ne fut pas nices,
57 De ce ne se fault pas doubter,
58 Qui vint le sermon escouter
59 Atout sa housse et son bonnet.
60 Il tenoit bien pour Symonnet
61 Cellui qui le sermon voult faire,
62 Dont ne[1] me pense pas a taire,
63 Car il n’est pas licencié.
64 Mais je suis pieça maistrié
65 Aussi bien que maistre Martins,
66 Car je presche touz les matins
67 Aux ouaillese et chas[2] cornus
68 Et a ceuls qui ont les corps nus,
69 Qui n’ont je robe ne finance :
70 A ceuls fais je faire abstinance
71 Et les malades fais jeuner[3]
72 Et les riches aprés disner.
73 Je presche a touz et faiz sçavoir
74 Qu’ilz puelent pouvreté avoir,
75 S’ilz veulent donner leurs richesces, 429c
76 Et qui veult avoir des destresces
77 Mette soy en gouvernement
78 D’autrui, s’en avra largement.
79 Pluseurs preschent que povreté
80 N’est pas ainsi qu’ell’[4] a esté
81 Au monde du temps Jhesucrist[5],
82 Mais je treuve asséz en escript
83 Qu’elle est de nouvel revenue
84 En plat pais ou elle tue,
85 Effronte, murdrit et assomme
86 Tant de peuple qu’il n’en est somme.
87 Richesse fait souvencions
88 Et puvreté destructions
89 Qui approucheront les citéz,
90 Se leurs noms y est recitéz.
91 Mais de ce ne vous puis plus dire
92 Fors tant que me vueilléz escripre
93 Quant vous plaira que je sermonne.
94 Et Dieux qui tous biens fait et donne,
95 Vous puist telement ordonner,
96 Qu’en la fin vous vueile donner
97 Son saint regne qui pas ne fine,
98 Si vray que j’eusse en la cuisine
99 Au jour d’uy voluntiers[6] esté
100 De mon frere d’umilité,
101 Deléz vous touz pour vous servir,
102 Si j’en peusse avoir loisir !
103 Et mauditte soit mon assise
104 Par qui je pers mo nentreprise!
105 Escript a la Ferté Alés[7]
106 Ou il n’a que frommaige[8] et lés
107 Et .iiii. causes seulement,
108 Dur vin et mauvais logement,
109 Ce deusisme jour de decembre, 429d
110 En une reumatique chambre.
[1] Ms. je ne
[2] Ms. aux chas
[3] Ms. jeunes
[4] Raynaud corrige en qu’elle
[5] Ms. de jhesucrist
[6] Ms. moult voluntiers
[7] Ms. sales
[8] Ms. frommaiges
