Dit 12 : Le prince de haulte eloquence (MCCCCIV)
D’un beau dit de ceuls qui contreuvent nouvelles bourdes et mensonges
1 Le prince de haulte eloquence
2 Et de parler en habondance,
3 Seigneur des choses incredibles
4 Pronuncees comme Euvangiles,
5 De voix moyenne et proprement
6 Devant tous et hardiement,
7 Par beaux moiens et raisons belles,
8 Saichans dire toutes nouvelles,
9 De qui ce vient, de l’afermer
10 Des[1] grans merveilles de la mer,
11 Des sciences et de la guerre,
12 De tous animaulx de la terre,
13 De l’air, des merveilleus poissons,
14 Des vendenges et des moissons,
15 Des chiens et des oyseaulx volans
16 Et des grans rivieres courans,
17 Du grief feu de saint Dalibras,
18 Qui a Cumieres et a Bras
19 Ardit Marne jusques au fons, 412b
20 Dont rové fut par deux maçons
21 Qui la asseoient leur serches
22 Au martel, .xxiiii. perches
23 Nouans a la queue brulee,
24 Et la avoit si grant fumee
25 Des autres poissons qui ardirent,
26 Qur les maçons se departirent,
27 Et monterent a Auviller
28 Leurs perches en son un piller,
29 Qu’ilz mirent en une fontaine :
30 La fousserent et devint plaine
31 De perches[2], si comme je truis,
32 Dont on en prinst .xiiii. muis
33 En un jour noires comme aronde,
34 De .vi. piéz tout emprés la bonde
35 Qui furent grans deniers venduz.
36 Mais les moines et les renduz
37 D’Auviller, ce croiéz pour voir,
38 Qui en mangierent furent noir
39 Et sont encor depuis celle heure,
40 Et leur habit comme une meure,
41 Et encor est chose plus voire,
42 Que la fontaine devint noire
43 Pour les perches, quant saint Nyvart,
44 Par sa priere et par son art,
45 A sa priere et sa requeste,
46 Et pour ce, qui va a sa feste,
47 En droit sommet de la montaigne,
48 Boute en un trou de la fontaine
49 Sa teste pour guarir du feu,
50 Des fievres et du mal saint Leu,
51 Dont mainte femme et mains maris
52 Ont puis illec esté garis,
53 Fist la fontaine soubz un ourme 412c
54 Revenir en sa propre fourme,
55 Et Marne qui tousjours ardoit
56 Refut tele comme elle estoit :
57 La ne se brulla puis escaille
58 De poisson, mais mainte merdaille
59 L’ont depuis prins et encor font,
60 Et si ne scet on qui ilz sont
61 Fors que les aucuns le gourmandent
62 Et maint autre pescheur le vendent
63 Cherement puis que Marne ardi,
64 Qui de l’embler sont trop hardi.
65 A tous ceuls qui scevent fonder
66 Nouvellement et recorder
67 Chose nouvelle et merveilleuse,
68 Qui ont paroule gracieuse,
69 Par lans des voyages estranges,
70 Qui donnent aux dames louenges,
71 Qui parlent d’armes et d’amours,
72 Qui scevent faire soutilz tours
73 Et eulx getter par beau langaige
74 De maint peril, de maint dommaige,
75 Qui scevent de tous cas parler,
76 Qui scevent venir et aler
77 Entre gens et si scevent tendre
78 Que ce qu’ilz donnent a entendre
79 Soit tenu vray des escoutans,
80 Qu’en son parler ne soit doubtans
81 Et moustre ses choses possibles
82 Par subtils moyens inpossibles,
83 Creables par ce que nature
84 Desire en tout et met sa cure
85 En choses nouvelles ouir
86 Ou maint seseulent resjouir
87 Et pert son vray entendement 412d
88 Pour nouvel oir, et s’on ment
89 Pour l’eure pas ne s’en recorde,
90 Salut, vray amour et concerde !
91 Comme tout homme mercenaire
92 Soit digne d’avoir son salaire
93 En chascun art ou il se mesle,
94 Un escripvain, cellui qui selle,
95 Chascun en son art mecanique,
96 Chose seroit a nous inique
97 Qui devons [nos] servens congnoistre,
98 Tant seculiers comme du cloistre,
99 Se pourveu n’estoient d’office
100 Par nous ou d’autre benefice
101 En no court, en nostre palays,
102 Clercs, chevaliers, bourgois et lays
103 Et autres selon leurs estas,
104 Marchans, procureurs, advocas,
105 Prelaz, abbez, prieurs, chanoines,
106 Officiaulx, tresoriers, moines
107 Et telles manieres de gens
108 Qui sont de trouver diligens
109 Et faire nouvelles partout,
110 Qui en scevent venir a bout
111 Par beaus moyens qui ne sont lourdes,
112 Non pas ces foulz faiseurs de bourdes
113 Ou il n’a ryme ne raison
114 Qui veulent en toute saison
115 Parler et ne scevent qu’ilz dient :
116 Ceuls a nostre estat contredient,
117 Ceuls n’ont lieu en nostre pouoir,
118 Ne nul n’en voulons recevoir.
119 Leur janglerie est trop commune,
120 Chascun les congnoist et chascune,
121 De nostre hostel les bannissons.
413a
122 Et il soit que sçavoir voulons
123 De noz gens en chascune ville
124 Ceuls qui sont appert et habile,
125 Pour eulx bailler gré en science
126 Et estat pour no conscience
127 Descharger, et par quoy li bon
128 Aient de leur bien fait guerdon,
129 Et que tousjours tendent a mieulx,
130 Et les jeunes qui ne sont vieulx
131 Prangnent de bien a eulx exemple
132 Pour qu’ilz puissent aler ensemble.
133 Ordonnons pardurablement
134 Qu’il se fera un parlement
135 Chascun an, es festes de may,
136 En nostre ville d’Espargnay
137 Et es autres villes du monde,
138 Et que ceuls ou loquence habonde
139 Et qui ont belle theorique
140 Et de parler bonne pratique
141 En faiz de beaus comptes compter,
142 Choses nouvelles rapporter
143 Et l’estat des pays voisins,
144 Picars, Champenois, Beauvoisins,
145 Normans, Briois, les gens de France,
146 Ceuls de Poitou et de Prouvence,
147 Guyennois, ceuls de Tournesis,
148 De Haynault et de Cambresis,
149 Du liege, et ceuls de Saint Omer
150 Et ceuls d’Ardre qui sont sur[3] mer,
151 Lymosins, Forez, Bourbonnoys,
152 Clermont, Beaumont, Orleans, Bloys,
153 Angevins, Bourgongnons, Lorrains,
154 Barroys et autres pais mains
155 [Et tous][4] ceuls de langue françoise, 413b
156 D’Yonne, Saine, Marne et Oyse,
157 De Loire, du Ryn, de Dordonne,
158 Du Rosne, de Loyn et de Somme
159 Et de tous les pais d’entour,
160 Seront la chascun a sont tour
161 Appelléz, et par nostre edit,
162 A ce parlement dessus dit
163 Par devant nous, a qui ce touche,
164 Adjournéz de main et de bouche,
165 Puis qu’ilz seront digne d’y estre,
166 Sanz espargnier ne clerc ne prestre
167 N’autre, pour courroux qu’il en face,
168 Car maint vouldra tenir sa place
169 Et soy escuser du mestier.
170 De tant ara le lieu premier,
171 Et sera l’un des presidens
172 De la court, s’il est souffisens,
173 Et quant de plus s’excusera
174 Et en excusant courcera[5]
175 De ce qu’il sera appelléz,
176 Tant sera il plus hault levéz.
177 Comme il soit que tout homme saige,
178 Si comme l’en voit par usaige,
179 S’excsue d’estat recevoir,
180 Quant plus a de sens et[6] sçavoir,
181 Et quant ce dit comme benigne,
182 De tant est reputé plus digne
183 Que cilz qui estat avoir quiert,
184 Qui riens n’en scet, a[7] li n’afiert,
185 Et l’en doit pourvir, qui a sens,
186 Aux offices, non pas aux gens,
187 Et par quoy, nous, qui desirons
188 Eslever tant com nous vivrons
189 Les eloquens qui ont memoire 413c
190 Du temps passé et que j’ystoire
191 Des nouvelles choses querir
192 Ne puist par no coulpe perir,
193 Et par deffault de pourveance,
194 Nous voulens pourveoir en ce,
195 Par quoy tout puist estre avoiré.
196 Avons a plain deliberé
197 Par conseil et deliberons
198 Que notre court et noz barons
199 S’assembleront une foiz l’an,
200 Puis a Paris, puis a Rouen,
201 A Orliens, a Bloys, a Reins
202 Et es autres lieux souverains
203 De nostre princeé et demaine,
204 Et a nostre court souveraine,
205 Qui durra par trois jours entiers,
206 Et couvendra que tout premiers
207 Se facent presentacions
208 Par ordre et recitations
209 L’endemain des faiz advenus
210 Comment chascuns s’est maintenus
211 Puis le temps de l’autre eschequier,
212 Ou parlement, s’il est mestier,
213 Et par maniere de requeste,
214 Baurra chascun a celle feste
215 Ou dira devant tous de bouche
216 Nouvelle chose ou escarmouche
217 [Ou] de guerre ou de paix estrange,
218 Pour avoir los, pris et louenge
219 Pour veoir le sens de chascun,
220 Et adviser que no commun,
221 Ensemble la chose publique,
222 Ne puist par quelque voie oblique
223 Estre mise a destruction. 413d
224 La se fera l’instruction
225 Comment l’en devra gouverner,
226 Et la voulrons nous ordonner
227 De nostre estat, et de nos gens
228 Faire baillis, prevosts, sergens,
229 Receveurs, procureurs et maires,
230 Tresoriers, clers et secretaires,
231 Grans conseilliers et advocas,
232 Selon ce que verrons leurs cas,
233 Leurs sens et leur bonne pratique.
234 President nous fault authentique,
235 Maint prelat et maint conseillier
236 Et un tresnotable grefier,
237 Qui fera de chascun epistre,
238 Et escripra en son registre
239 Ce qui ser baillié et dit
240 Au parlement, et a l’edit.
241 Connestable couvient, marchaux,
242 Capitaines et amiraulx,
243 Sergens d’armes, gens de chapelle,
244 Fourriers, chevaucheurs qu’om appelle
245 Souvent pour envoier dehors.
246 Armeurier nous fault pour no corps,
247 Fauconniers, veneurs pour deduit
248 Et varlés de chambre, de nuit
249 Et de jour, pour no[stre] service.
250 Nous fault queux et de mainte guise,
251 Hasteurs, potagiers et soufleurs
252 Et brouéz de maintes couleurs,
253 Maistres d’ostel de garnisons
254 Pour ordonner nos venoisons,
255 Pannetiers, eschançons, fruitiers,
256 D’escurie mains escuiers
257 Et pluseurs notables offices, 414a
258 Ou nous voulons des plus propices
259 Serviteurs qu’om pourra trouver
260 Au parlement et recouvrer,
261 Les uns monter, autres descendre,
262 Afin qu’om puist a chascun rendre
263 L’estat que desservi ara
264 Et selon ce qu’il s’aidera
265 De la langue soutivement
266 [Et] par beaux moiens proprement,
267 Sanz touchier matere villaine,
268 Et qu’il ait tousjours grant alaine
269 Pour parler en multipliant,
270 Et qu’il voist ses comps employant
271 De loing et sanz eschafeture ;
272 Point n’y a de peril s’il jure
273 Gracieusement et droit,
274 Qui bien croire ne le vouldroit
275 De ce qu’il dit et qu’il raconte,
276 Pour mieulx faire valoir son compte,
277 Car sanz jurer croient petit
278 Ly grant, ly moyen, li petit,
279 Mais en jurent[8] souvent s’afferment,
280 Et ainsi leur parler conferment
281 Les jurans par leur jurerie,
282 Car nature a ydolatrie
283 Et croire nouvelle dotrine
284 Par beaus moysn est trop encline,
285 Et croit lors trop legierement
286 A tel qui par exemple ment,
287 Et la voit on l’experience
288 Et ceuls qui ont vraie science
289 De saigement moustrer leurs fais
290 Pour estre de nostre palays.
291 Et pour tous ces poins publier 414b
292 Et nostre ordonnance lier,
293 Si qu’ingnorance n’y soit fecte
294 Desormais, mais ferme et parfecte
295 Demeure d’ores en avant,
296 Nous couvient envoier devant
297 Gens saiges et de grant essay.
298 Pour ce a Jehan Mignot d’Espargnay,
299 A Malapert, a Maisonsselles,
300 Qui escolles tiennent et selles
301 De sçavoir aler et parler
302 Et nouvelles choses trouver,
303 A Godefroy de Granne aussi,
304 A cuisy, au petit Choilly
305 Et a Pierre de Bonnancourt,
306 Qui sont pieça de nostre court,
307 A chascun en especial
308 Et tous autres en general
309 Qui aront sur ce congnoissance
310 Par tout le royaume de France,
311 [Et] a chascun d’ulx en droit soy
312 Mandons, commettons[9] que no loy
313 Facent publier en tous lieux
314 A toutes gens, jeunes et vieulx,
315 Qui bien se sçavront entremettre
316 De parler par tout a la lettre
317 Et qui en seront renommé,
318 Et que lors soient adjourné
319 De par nous de bouche et main mise,
320 Soit homs seculiers ou d’eglise,
321 A comparoir au parlement
322 Dessus dit, sanz excusement
323 Au dit Espargnay pour Champaigne,
324 En may la premiere sepmaine,
325 Le tiers jour du mois ou le quart,
326 Sauf grief essoigne, et sur la hart,
327 Ou du moins sur la langue perdre,
328 Et de no procureur aerdre
329 Contre lui a pugnicion
330 De corps et toute amission
331 De biens, et d’estre reputé
332 Homs plains de toute iniquité
333 Et forfaiz a nostre vouloir
334 Pour lui et son estat veoir,
335 Bailler ses faiz ou les escripre,
336 S’il ne les veult de bouche dire
337 Sanz forge et de son sentement,
338 Dont il nous fera bon serment
339 Pour deffendre et pour proposer
340 Qui riens lui vouldra opposer,
341 Et pour sauver ce qu’il dira
342 Pour sçavoir qui mieulx sentira
343 Et qui mieux mettera en fourme
344 Verité couverte de[10] bourde.
345 Et les autres es autres lieux
346 Semblablement facent au mieulx
347 Qu’ilz pourront, d’ajourner les gens
348 Dignes de ce, car nulz exemps
349 N’y a de nous fors approuvéz.
350 Bgros bourdeurs partout reprouvéz
351 Desquelz l’en voit la menterie,
352 Telz sont hors de no seignourie,
353 Pour pugnir aux gens seculiers
354 Au givet de.IIII. pilliers,
355 Car d’estre a nous ne sont pas dignes
356 Mais en sont privéz comme indignes.
357 Les autres facent proceder,
358 Qui seront dignes de parler,
359 Par devant noz gens au pays, 414d
360 Dont ilz sont et seront nays,
361 Chascun an a jour ordonné
362 Ou ilz doivent estre adjourné
363 Pour veoir leur euvre et leurs fais,
364 De quoy rappors nous sera fais,
365 Pour eulx pourveoir de guerredon
366 Et eulx faire d’office don,
367 Si comme au cas appartendra,
368 De quoy tresbien vous souvendra.
369 Et s’aucuns rebelles trouvéz,
370 Qui soient en l’art esprouvéz,
371 Qui ne vueillent venir a jour,
372 Nous vous mandons que sanz sejour,
373 En commettant, se mestier est,
374 Les nous admenéz sanz arrest,
375 Pour ocrriger et pour punir,
376 Comme il devra appartenir,
377 Tant qu’il soit a tout autre exemple
378 Et que chascun de paour tremble
379 Qui trespassera nostre edit,
380 Selon ce que dessus est dit ?
381 Et de ce que vous en feréz
382 Et des noms, vers nous rescriprez
383 Et devers ceuls des autres terres,
384 Tant sur le fait des gens des guerres
385 Comme seculiers et d’eglise[11],
386 Sanz faveur en aucune guise
387 Et sanz entreporter [un] homme,
388 Car mieulx vous vauldroit estre a Romme.
389 Et aussi de leur suffisance
390 Rescripvez et l’obeissance
391 Qu’ilz feront a no mandement,
392 Afin qu’a nostre parlement
393 Les ayons pour recommendéz. 415a
394 Et tous les poins dessus gardéz
395 Tant que negligence n’y ait,
396 Sur en estre pugny de fait.
397 Mandons et commandons a tous
398 Que ilz obeissent a vous,
399 En faisant deuement vos exploys,
400 Et vous prestent gens et harnoys,
401 Pouoir, prinsons, s’il est mestiers,
402 Pour en faire aucuns prinsonniers,
403 Se vous trovez rebellion,
404 En[12] faisent l’execucion
405 Des ordonnances dessus dictes,
406 Dont ilz ne seroient pas quittes.
407 En tesmoing de ce, nous avons
408 Nostre seel, du quel nous usons,
409 Fait mettre en ces lettres presentes,
410 Dont nous seellons noz povres rentes.
411 Donné en nostre tour de Fymes,
412 Les .xvi. et dix septimes
413 Jours d’octobre mil quatre cens,
414 Que no chancelliers fut absens,
415 Par le prince, en son brief conseil,
416 Sur l’esconsement du soleil,
J. Sohier
[1] Ms. Et des
[2] Ms. perchas
[3] Ms. sur la
[4] Ms. effacé
[5] Ms. courroucera
[6] Ms. et de
[7] Raynaud corrige en n’a
[8] Raynaud corrige en jurant
[9] Ms. et commettons
[10] Ms. de la
[11] Ms. de leglise
[12] Ms. Nulle en
