Dit 11 : A tous ceuls qui sanz ceulx verront (MCCCIII)

Lettre de ottroy
1                      A tous ceuls qui sanz ceulx verront
2                      Ces lettres et qui les orront
3                      Sanz oreilles, sours et muiaulx,
4                      Je, qui suys Eustaces Moriaulx,
5                      Huissier d’armes du Roy no sire,
6                      Salut, mais que je l’ose dire !
7                      Saichent tuit sanz bouter en hault,
8                      Qu[e] a mon compaignon Galhault,
9                      Derrain huissier d’armes du Roy,
10                    Ay ottroié et luy ottroy
11                     A Paris en lieu couvenable,
12                     En mon hostel, chambre et estable,                                                  411b
13                     Pour logier lui et ses chevaulx,
14                    Ou cas qu’ilz ne seront si maulx
15                    Qu’ilz ne laissent les gens dormir,
16                    Par ainsi qu’il fera venir
17                     A l’ostel chascune sepmaine,
18                    Pour eulx mangier, foing et avoine[1],
19                    Et fera litiere cerchier,
20                    Ou ilz gerront sur le planchier.
21                     Et a son partir de lyens,
22                    En fera mener son fyens
23                    Hors l’estable et oultre la rue
24                    Aux champs, que la maison ne pue.
25                    Bonne chambre ara pour son corps,
26                    Beau lit, blans draps, mais par dehors
27                    Gerront ses varlés autre part,
28                    Sanz ce que nulz d’eulx, sur la hart,
29                    Doye a paroy ou a maisiere
30                    Ataichier chandelle ou lumiere,
31                     Escripre es murs n’esgratiner
32                    Ne les paintures ruiner,
33                    Et aussi, s’ilz ont maladie
34                    Du ventre, nulz ne s’estudie
35                    D’entr’eulx de gaster la maison,
36                    Car en ce cas selon raison
37                    L’osteroit a ses propres mains,
38                    Et seroit banniz, c’est du mains,
39                    Sanz retourner atousjours mais
40                    Cilz qui seroit en ce forfais.
41                    Neccessaire a [il] ou jardin
42                    Ou l’en pourra chascun matin
43                    Aler une fois par licence,
44                    Par ainsi que nulz ne s’avance
45                    A l’entrer ne au retourner
46                    De fruit cueillir et emporter,                                                               411c
47                    Marjolaine, soussie, roses,
48                    Fenoil, lavande n’autres choses,
49                    Basilicon, coq, thanesie
50                    Ne vigne, puis qu’elle est flourie,
51                    Lis, herbe, glay ne violettes,
52                    Laitue, pourpié, persil, bettes,
53                    Cahourdes, cholz, prunes, cerises.
54                    Car se telz choses y sont prises
55                    Sanz le congié du jardinier,
56                    Il n’est ne maille ne denier
57                    Qu’om preist de ce pour l’amende,
58                    Fors tant qu’il faut que cilz se rende
59                    Tous nus, qui leans forfera,
60                    Pres du puis : la se lavera
61                    De son peché, car d’eaue froide
62                    Ara deux seaulx gettéz bien roide
63                    Sur son corps, et sera bannis
64                    Du vergier : telz est li edis.
65                    Cuisine aront, pelles et pos
66                    Pour leurs potaiges et leus ros,
67                    Sanz charbon, sanz buche et sanz paille.
68                    Et si aront table et corbaille,
69                    Fourmes, tretiaulx, touaille, nappe,
70                    Et du celier verront la trappe
71                     Ouverte, mais quierent du vin,
72                    Car si non a la Saint Martin,
73                    N’en a a l’ostel nulle fois.
74                    S’ilz veulent pain, feves ne pois,
75                    Char burre n’autre garnison,
76                    Poucin, plouvier, oe ne oison,
77                    Chapon, perdriz, grue ou ostarde,
78                    Vin aigre, vergus ou moustarde
79                    Ilz [les] pourront querre, et par pris,
80                    Droit a la porte de Paris,                                                                     411d
81                    Et s’ilz veulent avoir maree,
82                    On en fait es halles livree
83                    Pour l’argent.iii. fois la sepmaine.
84                    Et qu iveult du poisson de Saine,
85                    Voist le querre emprés Chastellet,
86                    Et qui voulra avoir du let,
87                    On le crie de rue en rue.
88                    Es halles est l’avoine drue :
89                    Le sabmedi illec la prain,
90                    Et a l’escole Saint Germain
91                    Le foing, la buche et le charbon,
92                    Ou en greve, la les vend on.
93                    Et pour ce a mon hoste l’ensaingne :
94                    On vent le vin a mainte ensaingne
95                    En pluseurs lieux, on le scet bien.
96                    Je ne vueil qu’om le laisse rien :
97                    Boivent tout quant ilz s’en yront,
98                    Mais sur le point les clefs rendront
99                    Au partir. Je burai les draps,
100                  Et se pelles ne pos sont cras,
101                   Je feray tout a mes despens
102                  Escurer, dont je me repens.
103                  Mais il fault, se Dieux me sequeure,
104                  Que l’en se couche de bonne heure,
105                  Sanz demourer trop longuement.
106                  Se cheval y a ou jument
107                  Qui m’empesche a dormir de nuis,
108                  Il sera tanstost mis a l’uis,
109                  Car ainsis fut il ordonné.
110                   Et sur ces poins ay je donné
111                   A Galehault, mon compaignon,
112                   Chambre et estable en ma maison
113                   A Paris, tant comme il vourra
114                   Et la demeure lui plaira                                                                       412a
115                   Par la maniere dessus dicte
116                   Et s’il ne lui plaist, quitte a quitte.
117                   En tesmoing de laquelle chose
118                   J’ay mis mon grant seel, dont je n’ose
119                   Seeller, a ces presentes cy,
120                  Qui furent faictes, Dieu mercy,
121                   En retournant du Dam en Flandres,
122                   A un feu et [a] belle cendre,
123                   A Artevelle [et] au retour,
124                   L’an de grace Nostre Seignour
125                   Mil .ccc. cinq [et] quatre vins,
126                   Qu’en France de Flandres revins.

[1] Raynaud corrige en avaine