Dit 10 : L’empereur de toute Fumee (MCCCCII)
C’est la commission des loups d’Espargnay sur la riviere de Marne
1 L’empereur de toute Fumee
2 Qui a mainte chose fumee,
3 Tousjours aufustes en effort,
4 Continuans de fumer fort,
5 A Jehan du Gart, nostre sergent,
6 Et a Guillemin de Nogent,
7 Et a chascun par soy, salut !
8 A nous griefment se sont dolut
9 Par nuit, de viéz et de nouvel,
10 La lignier frere Louvel,
11 Autrement nomméz Ysangrin,
12 Dame Hersant et leur affin,
13 Entour nostre maison des Champs,
14 A cris et a horribles chans
15 Hurlans comme tuit forsené
16 D’un brait laidement ordené
17 A.iiii. ou.vc. voix ensemble,
18 Dont de paour li cuers nous tramble,
19 Disans entour nostre maison 409d
20 Que ilz sont en possession,
21 Par eulx et leurs predecesseurs,
22 Comme bons et vraiz possesseurs,
23 D’avoir entr’e et d’avoir prinse
24 Dedenz l’enclos et la pourprinse
25 D’Espargnay, la viéz fermeté
26 Ou ilz ont pluseurs foiz esté
27 Au veu de touz, notoirement,
28 Sanz avoir nul empeschement,
29 Prins vaches, chievres, brebiz, pors,
30 Chevaulx, et yceuls porté hors,
31 Estranglez, mangez et destruis
32 Devers Vinay et de vers Cuys,
33 Et tout autour de la fortresse,
34 De son long et de sa largesse,
35 Prins oes, cannes et gelines,
36 De plain jour, et de grans eschines
37 De buefs et d’autre bestiail,
38 Franchement, a pou de travail,
39 Et toute autre proye a delivre,
40 Paisiblement, pour leurs corps vivre,
41 A plus esclarcir sanz arrest,
42 En temps et lieu, se mestier est,
43 Et tout ce qu’il leur a pleu,
44 S’ont ceuls de la ville sceu
45 De tous temps, et sanz contredit,
46 Et tout ce qui dessus est dit,
47 Le possession prenommee
48 Et la saisine ont ilz gardee
49 Par.i., par deux, par .iii., par quatre,
50 Par dix, par vint sanz riens rabatre,
51 Et par [un] si long temps que voire
52 N’est il du contraire memoire,
53 Tant qu’il suffist et doit suffire
54 A tout droit de chose parscripre 410a
55 A possession maintenir,
56 Continuer et retenir,
57 Et par les derraines annees
58 Que compaingnes en sont alees,
59 Y ont ilz mangié pluseurs chars
60 Ou il avoit chargié dix chars,
61 Sanz ce que Charmins ne Volens
62 Y osassent mettre les dens,
63 Ne les autres chiens des bouchiers,
64 Qui en mangassent voulentiers ;
65 Neantmoins, puis un an en ença
66 Que la fortresse encommença
67 A estre re[e]difiee
68 Et de nouvel edifiee
69 Par dit Thibault de Premier fait,
70 Qui a aux diz complaingnans fait
71 Bochier les troux et les entrees
72 Par ou ilz avoient leurs passees,
73 Et par la voix ceuls de la ville
74 Qui sur ce ont tenu leur consille,
75 Et ont le fait pour agreable
76 De la fortresse inreparable,
77 Et, qui pis est, ont ilz curé
78 Leurs fosséz, et tant procuré
79 Que l’yaue y ont fait avoyer,
80 Si que bien se pourroit noyer
81 Aucuns qui dedenz entreroit,
82 Mesmement qu’om lui getteroit
83 Pierres, garros ou viretons,
84 Car il y a de maulx glotons.
85 Et s’est la fortresse muree
86 Haultement et bien emparee :
87 Environ n’y a tour de pierre
88 Qui ne soit haucee a esquerre, 410b
89 Et les dictes tours gallendees,
90 Et si n’y a que deux entr’es
91 A pons levis levans du nuis,
92 Qui a ceuls font [par] trop d’ennuis,
93 Dont l’une est la porte Chalonge,
94 Et l’autre qui un po s’eslonge,
95 Est la porte de Jehan Lucas,
96 De quoy chascun garde le pas,
97 Et encor[1] y vont breteschant,
98 En troublant et [en] empeschant
99 Ysangrin et sa nascion
100 En leur dicte possession,
101 Et dame Hersant la deschausse
102 A tort, sanz raison et sanz cause,
103 Indeu[e]ment et de nouvel.
104 Et par ce y a eu maint louvel
105 Peri pour ceste tricherie,
106 Car les mastins de boucherie,
107 Qui ne s’osoient comparoir,
108 Puis qu’om fist l’effort apparoir
109 Et que l’entrer fut deffendu,
110 Ont mainte trippe despendu,
111 Et mainte charongne rungie,
112 Qui leur eust esté chalengie
113 Dedenz l’envlos d’icelle ville,
114 Requerans a leur voix horrible
115 Les diz Ysangrin et sa gent
116 Qui[2] de remede contingent
117 Et par nostre bonne ordonnance
118 Les vueillons pourveoir en ce,
119 Ou se non, jurent par leurs testes
120 Qu’ilz s’en rescourront sur noz bestes.
121 Si vous commandons, commettons[3]
122 Et estroictement enjoingnons, 410c
123 Et a chascun sur ce requis
124 Qui premiers du dit fait enquis,
125 Parties estans ou presentes
126 Sur les lieux ou l’en prant les rentes,
127 Pardevant nous pour ce appeléz,
128 Tenéz, gardéz et maintenéz
129 Ysangrin et sa nascion
130 En saisine et possession
131 De la franchise dessur dicte
132 D’entrer et rissir franc et quicte
133 De ceste[4] ville avec leur proye,
134 En faisant demolir la voye
135 De par nous, se il est mestiers,
136 Ainsi comme elle estoit premiers.
137 Faictes cesser l’empeschement
138 Mis a yceuls nouvellement,
139 Et contraingner les diz mastins
140 A restablir les larrecins
141 Des chars, des tripes, des boyaulx
142 Qu’ilz ont, encontre les louveaulx,
143 Ravi en leur grant prejudice,
144 Afin que nulz d’eulx ne prerice.
145 Et s[e] ilz en sont refusant,
146 En demeure, ou contredisant,
147 Contraingniéz les par toute voie
148 De bastons, que chascun les voie,
149 Si qu’ils s’en reviengnet criant :
150 Si ne seront pas si friant.
151 Et que realment et de fait
152 Le restablissement soit fait,
153 Ou cas qu’ilz ne s’opposeront :
154 Ou quel cas, et qu’ilz se voulront
155 Opposer, le lieu restabli,
156 De ce qu’ilz l’avront dessaisi,
157 Tantost, realment et de fait,
158 Le cas nouvele par eulx deffait,
159 Tous premiers et avant toute euvre,
160 Le debat et la nouvelle euvre
161 Et la chose contempcieuse
162 [Et] prinse comme largieuse
163 En nostre souveraine main,
164 Donnéz leur jour d’uy a demain,
165 C’est assavoir aux diz mastins,
166 Aux Hersant et ayx Ysangrins
167 Par devant Baussant le sangler,
168 Pour eulx destruire ou estrangler
169 Entre Sommesolt et Creton.
170 Et n’aient coustel ne baston
171 Fors que leur cuirie et leurs dens
172 Pour ferir[5] dehors et dedens,
173 Aler avant et proceder,
174 Sanz nos mandemens exceder
175 Ou fait de l’opposicion
176 Et en oultre selon raison,
177 Ainsi qu’en tel cas appartient,
178 En rescripvant, s’il le couvient,
179 Par devers nous de vostre exploit.
180 Et pour ce que pas ne nous loit
181 A despecier le neuf ouvraige,
182 Dont les loups perdent leur usaige
183 Par ceuls qui leur ont empeschié,
184 Nous, aux diz loups donnons congié
185 Pour tousjours et des maintenant
186 Que partut de cy en avant
187 Ou ilz pourront bestes trouver
188 Hors le fort, d’elles devourer,
189 Et qu’ilz se mettent en aguet
190 Pour elles [sur]prandre de fait, 411a
191 Soit vers saint Ladre ou vers Marduel,
192 En prenant lez Jehan de Maruel
193 Et les vaches Jehan des Ruelles,
194 Sanz avoir nulle mercy d’elles.
195 Car par eulx fu [faicte] l’emprise
196 D’estre la fortresse reprise,
197 Dont ilz ont perdu leur usaige.
198 Pour leur recouvrer, s’ilz sont saige,
199 Mandons et commandons a tous,
200 Que ilz obeissent a vous
201 Et a chascun sanz contredit
202 En tout ce que dessus est dit.
203 Donné aux Champs, nostre maison,
204 Out tous les vens sont en saison,
205 Au feu de nostre froide chambre,
206 Le.iiiie. jour de novembre,
207 L’an mil.ccc. soixante et dis,
208 Que du froit fusmes enrroidis,
209 A escripre ceste fumee
210 Dont nostre teste est enrrumee.
[1] Ms. encores
[2] Raynaud corrige en que
[3] Ms. et commettons
[4] Ms. la
[5] Ms. ferier
