Pièce 4 : J’ay une fiction trouvee (MCLXXXIX)
Cy parle d’une fiction d’oyseaulx gentils, et par especial, de l’aigle, roy des oiseaulx, ramenee a moralité au gouvernement des princes
J’ay une fiction trouvee
En une escripture approuvee
De l’Aigle, ou il fait mencion
Qu’elle tint en une contree
5 Son aire, et la s’est ordonnee
En prenant une porcion
De vivre sanz destruction
Pour son estat. Si fut amee
Des oiseaulx de la region,
10 Et n’y avoit cerf ne lyon
Dont elle ne fust redoutee,
Car loy estoit par lui gardee
Et justice sanz fiction.
De trois gerfaux fut advisee,
15 Et de trois faucons gouvernee,
Qu’elle ot toudis en sa maison,
Et ceuls firent droitte volee
En prenant la chose acordee
Pour son vivre et selon raison.
20 Pourveance fist de saison
Qui fut saigement dispensee.
[…][1]
Nulz n’osoit faire desraison
A oise nul, en l’air n’en pree,
25 Qui n’eust la teste couppe : 317c
Tele fut sa pugnicion.
Elle avoit pour faire justice
Deux terceléz, un jay propoce
Pour accuser les maufaitteurs,
30 Deux estourneaulx en un office,
L’un lay, l’autre avoit benefice,
Et deux chardonneriaulx docteurs,
Et chascun portoit les couleurs
De sa plume, sanz autre esclice
35 Porter, fors sa propre pelice,
Sanz contrefaire les honeurs.
Deux espreviers, pour son service,
Avoir trenchans, ou il n’ot vice.
Par tout avoit .ii. serviteurs.
40 En ses estas n’avint esclopce,
Car chascuns gouverna sa lice
Vraiement sanz estre menteurs.
N’onques n’avoient successeurs
Que par mor[t]. Point ne fut conlice
45 De remuer, sanz grant malice,
Ses servens l’Aigle aux bonnes meurs.
Pour son demaine recevoir
Ne vit l’en a celle aigle avoir
Fors[2] deux coulons et une choe.
50 Et si vouloit l’Aigle sçavoir
Tousjours l’estat de son avoir
Et ses despens, dont je la loe.
Ne vouloit que poucin n’aloie
Fust prins sanz paier : qui doloir
55 S’en venist, et trouvé fust voir,
Chascun des trois perdist la joe.
Paier faisoit du main au soir.
Grans mes ne vouloit recevoir,
Car grans mangers les oeulx esbloe 317d
60 Et fait la forcelle doloir :
Trop bien le scet apercevoir
L’aigle, qui telz mangers desloe.
L’argent de la bourse en descloe.
De deux mes prinst a son vouloir,
65 Sanz excés. S’ot plus grant pouoir
De voler et plus mendre escroe.
Pour oir l’estat de sa terre
Fist .ii. corbaulx cerchier et querre
Aus quelz on rendoit de tout compte,
70 Et deux pumars pour aler quere
Les papiers enferméz soubz serre
Afin que riens n’alast a honte.
Par eulx sceut que sa terre monte,
Et de ce vouloit bien enquerre,
75 Fust en temps de paix ou de guerre,
Ainsi que l’istoire raconte.
D’autre Aigle ne voult riens aquerre,
Son nif ne son aire conquerre.
Il lui souffist qu’elle surmonte
80 En son pais ou elle terre
Ses subgis, et qu’on ne desterre
Le bestail qui a lui se dompte.
Qui se lait fouler il s’ahonte :
Pour ce voult garder et requerre
Ses oiseaulx et tenir soubz luerre
85 L’Aigle dont je vous faiz le compte,
Qui si bien son fait ordonna
Et a ses gens gaiges donna
Si regléz qu’il devoit suffire,
90 Tant que chascuns se contenta,
N’autres dons ne lui demanda,
Et ainsi acrut son empire
Si que nulz n’osoit contredire 318a
Deça la mer ne par dela
95 N’a[3] possession qu’elle a,
Ne nulz ne vous pourroit descripre
Qu’oiseaulx n’eust vers li du pire
Qui s’efforçast de grever la,
Ne nulz d’iceulx ne la foula
100 Qu’il n’ait esté mis a martire.
Pour quoy ? car tout oysel l’ama,
Pour justice qu’entr’eulx garda
Et qu’elle voult les bons eslire,
Les ostouers prinst et corriga
105 Et les escoufles justiça
Qui voulrent les poucins destruire.
Les renars fist trembler et fuir,
Les loups du bec escervela
Et tout animal qui embla
110 En l’air, en terre, et a voir dire
Nulz ne lui pouoit contredire :
Par ses nobles vertus regna,
En grans richesces demoura
En grant paix et joye sanz yre.
115 S’elle donna a quelque oysel,
Elle fist mettre en un moncel
Le don, et lors fut merveilleuse :
Quant elle veoit le tropel
De [tout] l’argent sur un carrel
120 Ou un tapiz, trop fust honteuse
Du grant mont, et trop desdaigneuse.
Lors se restraint dedenz sa pel,
A ses dons mist bride et gourmel
D’une restrainte gracieuse.
125 Moult faisoit en son pais bel.
S’elle donna, son don ysnel
Fut baillié, sanz chose doubteuse. 318b
Se d’or y eust plain un tonnel
Ou d’argent, fust pierre ou annel,
130 Delivrer fist la vertueuse
Son don, sanz estre mençongeuse.
Plus n’en convenoit faire appel.
Pour ce de verité l’appel
Aigle plaisant, humble et piteuse.
135 En cest estat long temps se tint,
Honeur en tous cas lui advint,
De tous viens fut ses regnes plains,
Pour une beste venoit vint
D’estranges lieux. La se containt
140 Tant que boys, rivieres et plaisn.
D’oyseaulx et bestes furent plains,
Et tant en y venoit et vint
Qu’envoier dehors en convint
Pour peupler autres pais mains :
145 Car la garde et justice obtint
Contre tous, et si mesavint
A aucuns oiseaulx souverains,
Elle les secourt et retint,
Et l’ardeur de leur perte estint,
150 Et n’ot cure d’oiseaulx villains.
Et se guerre ot entre forains,
Ses voisins, bien lui en advint.
D’eulx appaisier ne lui souvint
Car ses regnes en fut plus [sains][4].
155 Grant espargne fist a son [tens] [5],
Et si ordonna par son sens
Grues en divers lieux du mon,
Qui furent alans et venans
Et les nouvelles rapportans
160 Tant par elles com[6] par laron,
Si que guerre ne sourt ou bonde, 318c
Riotes, noises ne contens,
Qu’el[7] ne saiche, et est pourveans
Aux perilz, tant fut saige et monde.
165 Les poucins, les jeunes enfans
Des faucons, pour estre volans,
Des nolbes oyseaulx, a la ronde[8]
Fait mener par estranges gens,
Si qu’ilz ne soient negligens,
170 Que paresce ne les confonde
Par deliz, et que nulz ne fonde
Sur les aires pour estre lens,
Mais soient legiers et soufrans
Par la plaine qui leur suronde.
175 Par ces poins et celle ordonnance
Tint celle Aigle en grant excellence
Son empire toute sa vie
En paix, en joie et en puissance,
Ses oyseaulx en obeissance,
180 En bonne amour entr’eulx unie.
Ses offices n’esleva mie,
Ne du nombre ne fist croissance,
Ne les desmist sanz pourveance
Par faulx rappors ne par envie.
185 Elle vivoit a souffisance,
Sanz excés d’emplire sa pance.
Tousjours estoit sa court garnie
D’oiseaulx fors, de belle apparance,
D’umble cuer, qui font reverance.
190 […][9]
Tousjours estoit acompaignie
D’anciens oiseaulx de prudence,
Qui tousjours firent residence
Pour honourer sa seignourie.
195 En celle grant prosperité,
En ce bien, en celle unité, 318d
Celle Aigle, qui tres vielle fu,
Trespassa, dont ce fut pité.
Un jeusne hoir en son herité
200 Laissa, qui avoit pou veu.
Beaus estoit, non pas parcreu :
Aux jeusnes prant affinité.
Des biens avoit infinité
Qui furent trop mal despandu.
205 Car li viel n’ont pas creu esté :
Li tercelet et li hobé,
Ly esmerillon sont venu,
Li jeusne faucon affamé,
L’esprevier, li ostoir privé,
210 Chascun lui a couple tenu.
Telz y vint desplumé et nu,
Qui tantost s’i est remplumé.
Sa char et son sang ont humé
Et sont com pere et mere deu[10].
215 Le conseil donnent de jeunesce
Et lui baillent Fole Largesce
Qui veult estre sa despensiere,
Et une pie jangleresse
Qui autre oisel parler ne lesse
220 Mais boute verité arriere,
Les bons oiseaulx blasme en derriere
Et fait retenir l’ostrucesse,
Bestial, plaine de paresce :
Ainsis va ce devant derriere.
225 Or vole celle Aigle et se dresse,
Et voit l’avoir et la richesse
Que son pere ot acquis premier.
Ne cuide pas que jamais cesse.
Lors donne a mains ce qu’il posesse,
230 Aux fouls oiseaulx fait bonne chiere. 319a
Chascuns quiert estrange maniere
De demander, d’avoir promesse
De chetis oiseaulx a grant presse :
Adonc se destruit la miniere.
235 Une heure vole en Orient,
Autre heure vole vers Midi,
En Septemtrion va courant,
Autre heure demeure en son ny.
Et en volant sont maint honny
240 Des oiseléz, qui vont tremblant,
Et parlent jusqu’en Occident
De ce qu’om les gouverne ainsi.
Pour quoy est ce ? Pour ce qu’om prant
Le leur. Or dittes donc, et qui ?
245 Cil escoufle, cil perliquant,
Qui tuent sanz avoir merci.
Les povres oyseaulx sont[11] peri,
Qui n’en ont droit ne jugement,
Fors que la paine et le tourment :
250 Tout est pardonné, je vous di.
De justice parler ne fault :
Il n’y a ostoer ne gerfault,
Escoufle, pie ne cornaille
Qui n’echappe, et ne lui en chault :
255 On leur pardonne leur default.
Perdrix n’en puet durer ne caille,
Brebiz, mouton, pourcel n’aumaille,
Tout se prant sanz dire : que vault ?
Tant que tout le bestail default,
260 Et si n’est nul a qui en chaille.
Les voisins, pour ce voler hault,
Qui sont malicieus et caut,
Aus quelz l’en destruit graint et paille,
Ont en leur cuer d’en faire assault : 319b
265 Contre l’Aigle trop ont cuer chault,
Quant prandre voient leur poulaille
A brehiers et a villenaille,
A cosmarans, qui se font baux
Pour l’Aigle, et ne sont que ribaux
270 Entre les oiseaulx et merdaille.
Or s’en vont a cens et a mille
Les dons a maint qui n’est habille
Des oiseaulx d’avoir un denier,
Qui en achatent terre ou ville,
275 Et qui est vilz et d’aire vile.
Et li faucon et esprevier
Ont a tresgrant paine a mangier,
Et ceuls qui ont teste soustille.
Riches se fait qui prant et pille,
280 Mais ainsi vuide le grenier.
Ou l’Aigle c’un servent n’avoit,
.xii. en y a, et ce que doit ?
C’est destruction de pays.
Car maint d’iceuls ne se congnoit
285 En son estat. Des gaiges joit.
S’en sont les oiseaulx esbahis,
Plus fault a.xii. oiseaulx qu’a sic,
Et soustenir ne se pourroit.
Mais qui tous les restraind[e]roit,
290 Ce seroit un tresgrans proufis.
Car deux ou un autant feroit
Ou .iiii., qui les esliroit,
Sur pluseurs estas qui sont mis.
L’argent a l’Aigle demourroit,
295 .iic. mil[12] frans, s’il lui plaisoit,
Ou gaiges a trop excessis.
Et quant un fait autant com dix,
Grant merveille est qu’om n’y pourvoit. 319c
[…]
300 […][13]
Mais l’Aigle a le veue esbloee
Pour la louenge a lui donnee
De son gent corps, par vaine gloire.
Plus ne fault qu’elle soit troublee.
305 Ne restraingne pois ne puree,
Cresson, moustarde, pomme ou poire,
Mais de restraindre soit memoire
Ses grans gaiges, sa grant donnee,
Et le nombre d’offices vee
310 Si grant qu’il est, s’il me veult croire.
Soit toute chose ramenee
A estat deu, non excedee,
Car on espuiseroit bien Loyre.
Qui charge la seconde annee
315 Plus qu’il ne doit, perte engendree
Lui est, pour estre debitoire,
Et par un tel cas d’acessoire
Quant une terre est endebtee,
Qui ne restraint, chose est prouvee
320 Qu’om pert adonc le possessoire.
L’aigle, qui mestier de restraindre
A, a present se vient complaindre
De son estat aux vielz oyseaulx,
Prians qu’ilz ne se vueillent faindre,
325 Car trop voult com simples empaindre
L’oppinion des jouvenciaulx
En son cuer, plus [ne] vuelt a ciaulx
Conseillier, dont son fait est maindre :
Desor les veult amer et craindre
330 Com ses amis especiaulx.
Lors dit l’un : ― Il vous fault despaindre
De vostre cuer et tout estraindre
L’ennortement des cuideriaulx.
De jeunesse vous fault refraindre, 319d
335 Le temps perdu gemir et plaindre,
[…][14]
Que vous fuiéz les desloyaulx :
Le mal en bien vous convient taindre,
De diligence et vertu saindre[15]
340 En tous voz faiz especiaulx.
Creéz au faucon de vo linaige,
Au gerfaut de vostre paraige,
A ceuls qui sont de vostre genrre,
Aux plus anciens qui sont saige,
345 Car ceuls pour vous metront en gaige
Terre et tout, et le corps en cendre.
Laissiéz vous doucement reprandre,
Sanz user de hautain couraige.
Restraingnéz ce qui est oultraige
350 Vueilliéz retenir et aprandre.
Aiéz verité en usaige,
N’uséz point de perdre langaige.
Faittes a chascun son droit rendre :
Voisent li buef a leur ouvraige
355 Et li oysel de gros plumaige :
A les[16] lever ne devéz tendre.
Deffendéz que nulz, sur le pandre,
Ne tue aux champs ne au villaige,
Praingne ou ravisse par pillaige,
360 Et se gart chascun de mesprandre.
Se l’en prant riens pour vostre hostel
Ne pour ceuls de vostre costel
N’en la terre de voz voisins,
Faictes tout paier le chastel,
365 Car c’est trop grant pechié mortel
De mangier les biens qui sont prins
Sanz paier. Com mauvais lopins
Sont saléz de trop mauvais sel,
Dont on pert l’ame et le vaissel. 320a
370 Deshonouree en est la fins.
Nulz ne doit en autrui pourcel,
Sanz paier, mettre son coustel,
Ne prandre les blez ne les vins,
Les foings, les grains, drap ne burel,
375 Des povres brebiz ne la pel
De quoy l’en fait les parchemins,
Dont leurs faons sont orphenins
Et en povreté sanz rappel,
Pour gouverner un grant tropel
380 De merdailles et de coquins.
Tu dois, selon ta revenue,
Vivre et regner. Doncques te mue
Et vif comme ti ancien.
Le trop d’officiers remue
385 Que tu as comme osieaulx en mue,
Et si ne te servent de rien
Fors de gaster peuple et le tien,
Mille et cinq cens. Pour ce t’argue,
Qu’ilz ont sanz cause retenue,
390 Des quelz ne te puet venir bien.
Sur tel bestail qui fait la creue
Sera [ta] despense descreue
De deux cens mil. Or le retien :
Moins en yert ta despense deue
395 Et ta gent plus voulentiers veue.
Voist s’en chascun a son lien,
Ses gaiges superflus retien,
Car on feroit grosse massue
De deux cent mil : chose est perdue.
400 Restraing com bon phisicien.
Regarde a droit et par loisir
Ceulx qui se scevent bien chevir
Et qui font valoir leur besongne 320b
Loyaument, sanz prandre ou tolir,
405 Sanz convoitier : ceuls requerir
Doiz tu, et tes sers embesongne
Ou qu’ilz soient, car je tesmongne
Que par deux puéz plus enrrichir
Que par cent qu’on te vient offrir
410 Qui ne quierent[17] fors qu’om leur dongne.
Des autres te fault enquerir,
En tous estas pour toy servir,
Et, se bons sont, ne les ressongne.
Fay les de toutes pars querir
415 Et en ton service venir,
Garde qu’ilz n’y quierent alongne.
Ceuls qu’om permet vers toy eslongne,
Et les bons vueilles remerir,
Si ne pourra ton fait perir.
420 En ce cas ne doiz mettre allongne.
Du restraindre que tu feras
Tes jeunes poucins nourriras,
Et ly oisel prieront pour toy,
Quant les cuers oiseux aprandras
425 A ouvrer, et ne soustendras
Leurs oyseuses ne leur desroy.
Car pluseurs se parent com roy
Des propres plumes que tu as,
Et de la t’est venu grans gas
430 Et dommaiges, de ce me croy.
Appartient il que le harnas
Porte uns corbaulx ou uns huas
De l’Aigle et le noble courroy ?
Nennil. Mieulx deussent ou fanas
435 Becquier, et vestir chavenas
Qu’oser penser a tel arroy.
Euvre tes oeulx et te resjoy 320c
Ou cas que tu te restraindras
Et les autres ordonneras
440 Si que chascun tiengne sa loy.
Fay chascun vestir sa cotelle.
Voist chascun avec sa femelle
Sanz sa fourme degenerer.
Soit a chascun sa plume belle,
445 Au coulon et a l’arondelle,
Sanz fauses plumes emprinter,
Dont li corbaulx se fist huer
Qui du paon print plume nouvelle,
Mais pour ce perdit sa querelle,
450 Quant au paon vouloit ressembler.
Oste ces oyseaulx de cautelle,
Qui trois et trois sient en celle,
Qu’om doit cahuans appeler.
Le jour heent et la chandelle,
455 Par nuit volent, et a la belle
Trois d’iceuls se vont esconser.
Par jour ne les puet on trouver,
Car veritéz en eulx chancelle.
En dortoir ont ou en chapelle
460 Si qu’om ne puet a eulx parler.
Ceuls monstrent par ceste figure
Que cahuans n’ont de jour cure,
Car oisel sont immonde et ort
Qui font a la clarté injure.
465 De jour tout oisel leur court seure[18],
Chascun qui puet les pince et mort.
Les juifs sont comparéz au fort
A ces oiseaulx, pour leur doure,
Qui contre la saincte Escripture
470 Mirent sanz cause Dieu a mort,
Demourans en leur loy oscure,
Laissans le vray souleil qui dure 320d
Pour l’ombre de nuit qui les tort.
J’en congnois qui sont si parjure
475 Et si mentent a desmesure,
Qu’om te donne par eulx le tort
[…][19]
Dont ilz aront maladeventure.
Muser font mainte creature,
480 Qui en destruit sanz ressort.
Oste ces oisiaulx noirs et gris
Qui estoient tous amaigris
Quant de toy furent retenus,
Qu’ilz ne te lai[sse]ront perdris.
485 Sur toy pluet : ilz ont bon logis,
Bien sont empluméz et vestus.
Veulz tu avoir grans et escus ?
Reçoy le tien .iiii. ans ou six,
Comme ilz ont fait, et je te dis
490 Que tu seras riches tenus.
Envoie les a leur mestier
Et repran, se tu as mestier,
Ce qu’ilz aront mal prins d’argent.
S’ilz sont en l’estat de premier,
495 Voisent au change ou au moustier,
Car trop font de mal a la gent.
Par mentir font maint indigent
Tel oisel qu’om ne doit prisier.
Or vueilles leur mentir brisier,
500 Car Dieu het tout homme qui ment.
Donc, pour doubte de Dieu courcier,
Tu en doiz la terre espurgier
Pour eschiver l’advenement
De l’ire que Dieux envoier
505 Te pourroit, car le droit loier
De bien et mal a chascun rent.
Si dois doubter son jugement
Et de ton pouoir l’appaisier. 321a
Telz cahuans faire vuidier
510 Ou regner veritablement
Tu vois les traces de ton pere,
Dont la vie fut belle et clere,
Et comment il fu veritable.
Or fay que sa vertu appere
515 En toy, car filz ne degenere,
Par nature, de son semblable.
Or fut il Aigle tresnotable,
Qui ne voult [ne] tondre ne rere
Ses oiseaulx, mais par juste arrere
520 Leur estoit tous temps secourable.
Des vertus qu’il avoit te pere,
Et a restraindre te compere
A ceuls qui furent espargnable.
Pour ce que, s’une chose amere
525 Te venoit, com oisel sanz mere
Tu ne fusses pas decheable
Ne a tes oiseaulx domagable
Par empruns. Garde ce mistere
De mettre aucune chose amere,
530 Car ce te sera proufitable.
Ne croy oysel pour son beau chant,
Car maint en a esté meschant
Qui cuidoit de mençonge voir.
Oysel menteur va decepvant.
535 Garde toy de l’oisel flattant,
Car il te cuide decepvoir.
S’il te dit blanc, respons lui noir.
D’entour toy le soies chaçant
Et en autre marche esvolant
540 Et lui fuy de tout ton pouoir.
Je croy que je tairoy a tant
Mon chastoy, car en recitant
De ton bon pere le sçavoir, 321b
Est asséz cler en apparant
545 En quel guise il fut gouvernant,
Tant qu’il estoit riches d’avoir,
Or fay donc ton sens apparoir,
Selon son fait, d’or en avant,
Et se tu lis ce dit souvent
550 Tu en dev[e]ras mieulx valoir.
L’aigle, quant il ot entendu
Le gerfaut, lui a respondu,
Et [a] son oncle, le faucon :
― Parens, je suis a vous tenu,
555 Et se mal me suis maintenu,
Tout vueil faire ce qui est bon.
D’or en avant, excessif don,
Gaige, officier malostru,
Chetis ne seront retenu.
560 De mon pere vueil le renon.
En tout bien, que, qui vueille ou non,
Sera a mon fait secouru
Et par vo conseil pourveu :
Au monde vueil avoir bon nom.
565 D’un arbre est l’Aigle descendu
Ou le gerfaut et faucon fu,
Et s’avoit illec environ
Maint noble oysel sur le velu,
Qui de plume estoit velu.
570 Chascun avoit gente façon,
Qui oirent ceste leçon
Recorder, dont aucuns sont mu.
Li autre en sont de joye dru[20],
Qui en chantent maint joieux son,
575 Mais li corbaut et li lanon
En sont tuit dolent devenu,
Couart, lasches et esperdu,
Doubtans qu’ilz n’aient ja pardon. 321c
Ceste fiction ramenee
580 Puet bien estre, et moralisee
Par l’Aigle a maint roy et baron
Qui leur terre ont bien gouvernee
A leur vivant, puis desertee
Fut par leurs enfans, ce dit on,
585 Si comme du filz Salemon,
Roboan, qui a despitee
La science des vieulx donne.
Aux jeunes crut. Pour ce lison
Que sa terre fut divisee
590 A Jeroboan et donnee
Qui en ot la plus grant parson.
Soit donc dotrine a ce menee
Que le conseil des vieulx ne hee
En cest secle li jeunes hom,
595 Car leur prudence es afermee
Par grans cours de leur vie usee.
S’ne vault mieulx leur oppinion.
Helas ! pour quoy ne s’i fy on ?
Jeunesce n’est c’une rousee
600 De sang chaut, qui tantost s’effree.
De cest chalour nous gardon
Tant que joie soit aprestee
A l’ame en gloire beneuree,
Ou tous ça jus tendre devon.
Cy fine le dit et fiction de l’aigle sur le gouvernement des princes
[1] Vers manquant
[2] Ms. Et
[3] Saint Hilaire corrige en A la
[4] Mot effacé.
[5] Mot effacé.
[6] Ms. comme
[7] Ms. Quelle
[8] Ms. larronde
[9] Vers manquant
[10] Saint Hilaire corrige en eu
[11] Ms. en sont
[12] Ms. mille
[13] Vers manquants
[14] Vers manquant
[15] Ms. faindre
[16] Ms. iAlles
[17] Ms. requierent
[18] Saint Hilaire corrige en sure
[19] Vers manquant
[20] Ms. deu
