Pièce 3 : Gens qui ne partent d’une place (MLXXI)
QUESTION
Gens qui ne partent d’une place
Sanz chevauls avoir ne despense
Fors sanz plus [que] d’emplir leur pense,
Ont d’amasser temps et espace.
RESPONCE
5 Vous dittes voir, qui bien y pense.
Gaiges ont grans : en po d’espace
De temps font grant tresor en mace,
Mais tel tresor est en balance.
QUESTION
Ceuls qui cuident estre plus saiges
10 Et qui soustiennent divers cas
Pour l’argent, com les advocas
Se deçoivent par leurs oultraiges.
RESPONCE
Ou la paix est mettent debas
Pour l’argent, telz est leurs usaiges.
15 Mais li tiers homs[1] en leurs linaiges
Du mal acquis n’eritent pas.
QUESTION
Aucuns clers, il a ja long temps
Ont mis sus la chevalerie
Tous maulx, tous vices, tous contemps,
20 En donnant la gloire a clergie.
RESPONSE
Maint sont clers ou n’a que folie,
Car sanz sçavoir sont hors du sens,
Si se puet l’en bien chevir sans
Telz clers, ou science n’est mie. 283a
QUESTION
25 Comment ont les mauvais le temps
Occupé si longue saison,
Ravi les biens contre raison,
Destruit le monde et povres gens ?
RESPONSE
Tu verras en fin leur maison,
30 Leurs corps, leurs femmes, leurs enfans
Destruis, pour leurs pechiéz nuisans,
Si ne doit nulz estre mais hom.
QUESTION
Quant seront les bons exaucéz,
Et quant aront ilz congnoissance ?
35 Quant aront les saiges puissance,
Quant seront ilz guerredonnéz ?
RESPONSE
Ce sera brief, le temps s’advance
Que les mauvais seront ostéz
D’entre les bons. Or attendéz,
40 Si verréz de Dieu la vengence.
QUESTION
Nuls ne veult mettre regle en li
Ne croire que mal lui avaingne
Jusqu’a temps qu’ou peril se baingne
Et qu’il s’i voit enseveli.
RESPONSE
45 Foulz est congus a tele ensaingne :
Jusqu’il prant ne craint l’ennemi,
Pour ce ne treuve nul ami
En sa dolour, ne qui le plaingne.
QUESTION
Qui d’autrui mal se glorifie
50 Qui ne lui resgarde ne touche,
Tele gloire son mal approuche, 283b
Car ce n’est que mauvaise envie.
RESPONSE
Cilz qui voit le feu en sa bouche
Doit doubter des dens en partie
55 Qu’ilz n’ardent. Ne s’assurent mie
Toit sanz feu, s’a l’ardent n’atouche.
QUESTION
Comment pourront cesser les maulx
Tant que les fortunes n’aviengnent
Qui toutes les vertus estaingnent
60 Des petits jusques au plus hauls ?
RESPONSE
Il convient qu’ilz plourent et plaingnent
Leurs grans pechiéz et leurs defaulx
Envers Dieu, snz plus estre faulx,
Et que leurs grans orgueilz restraingnent.
QUESTION
65 Le temps est que de la parole
Du povre, tant soit veritable,
Se moquent maint et en font fable.
Qui povres est, on le rigole.
RESPONSE
Voire, mais se riche parole,
70 Il a la voix si agreable
Que l’en tient sa mensonge estable.
Ceste conclusion est fole.
[1] Saint Hilaire corrige en hoirs