Lay 11 : Escoutéz mon sentement (CCCXIV)
XIe Lay
Le Lay Perilleux
Escoutéz mon sentement 101a
Qui avéz gouvernement
Et vous qui vouléz servir :
Car je vous vueil descouvrir
5 Et ouvrir
Quoy et comment
Le peril et le tourment
Proprement
Qui vous en puet advenir.
10 Gardéz vous premierement
De peuple, femme et enfant,
Car ces trois font a cremir.
Pour bien mal font remerir
Et perir
15 Dolentement,
Leur bon et loial servent
Bien souvent :
Si fait bon ces trois fuir.
Boece qui tant fut saige
20 De vray cuer et de couraige
Le peuple Rommain servi,
Leur bien crut, mais leur dommaige
Rebouta, et bon usaige
En leur cité establit.
25 Theodoise contre lui
Fut meuz d’ire et de raige,
Pour ce que par beau langaige
Sa cruaulté deffendit.
Lors faint que par un messaige
30 Boece a ceuls de Cartaige
Devoit estre vray ami
Contre Rommains (vez quel raige !)
L’innocent fut mis en caige
Et jugié sanz estre oy.
35 De bien faire mal joy.
A Pavie ot son estaige.
En prinson dure et sauvaige
A illec son temps feni. 101b
Veéz la retribucion,
40 La soudaine mottion,
Et le croire trop legier.
Veéz la condempnacion
Du peuple a l’acercion
D’un faulx et faint messagier,
45 Sanz la partie approuchier
N’oir sa deffension.
Vez ci grant confusion
De si faintement jugier.
Boece estant en prinson.
50 Regna par sa traison
Theodose fort et fier,
Et mist en sugeccion
Rommains, par ceste raison.
Car destruit ot son guerrier
55 Qui les deffendoit premier.
Veans leur perdicion,
Crioient la destuccion
A tart de leur emparlier.
Las ! quel mort fut delivree
60 Ou Capitole et livree
Cesar, pour servir commun,
De grefes, non pas d’espee !
En .xii. lieux martiree
Fut sa char, car un chascun
65 Des senateurs, un a un,
A sa broche en lui boutee
Par fausse envie prouvee
De pluseurs, et non pas d’un.
Sa mort fut moult reclamee,
70 Lui vivant, petit amee
Pour ce qu’il sembloit enfrun.
Mais depuis fut regretee
Et curieusement vengee
Par son filz o l’acier brun. 101c
75 D’onneur estoit le droit flun.
Romme en fut feshonouree.
Vez ci mauvaise souldee
Des mors, dont Cesar fut l’un.
Que fait cilz qui femme sert ?
80 Maintefoiz en est desert,
Destruit et deshonouré.
Pour trop pou son bien [y] pert.
Plus tost change que le vert
Ou que temps n’a efflouré.
85 S’a present a bien ouvré,
Un pour sa grace dessert,
Mais en un moment n’y pert.
Or a cilz bien labouré !
D’autre part souvent appert,
90 S’omme est legier ou apert,
Qu’om a tost un mot rué.
S’en haiz en couvert
Ou la dame a l’uiel ouvert
Qui l’a souvent regardé.
95 Mains en ont esté lardé
Et murdris a descouvert.
Sanz raison foulz s’i ahert.
Tel service est redoubté.
Mais de servir aux enfans
100 Est encor li perilz grans,
Horribles et merveilleux.
De mal faire sont engrans.
Se de leurs maulx les reprans,
Tu seras leur haineux.
105 Se tu leur es doucereux
Tu es leur mal gouvernans,
Deshonouréz et meschans :
Or ne soiéz pas d’iceulx.
Seneque, dont [je] ne mens,
110 Qui tant fut Noyron amans 101d
Le trouva trop perilleus.
Par crainte le fut doubtans,
Devant lui s’estoit levans.
Mais tout[1] en fut desdaingneux
115 Que Noyron comme crueulx
De l’occire[2] fut engrans.
Saingnier le fist li tirans
Et mourir en baing tous seulx.
Qu’ot Joseph de povreté
120 De durté,
De maleurté,
Quant Dieux nasqui ?
Maintefois l’a comporté,
Et monté
125 Par bonté
Avec sa mere autressi,
Sur sa mule les ravi :
Je le vi
Paint ainsi.
130 En Egipte en est alé.
Le bon homme est painturé
Tout lassé,
Et troussé
D’une cote et d’un barry.
135 Un baston au coul posé,
Viel, usé
Et rusé.
Feste n’a en monde cy,
Mais de lui
140 Va le cri :
C’est Joseph le rassoté !
Dieux ! que de mal et de paine
A qui femme et asne maine,
Qui sert enfant et commune !
145 L’un chastie et l’autre aplaine.
Aise n’a jour ne sepmaine,
Grace de l’un ne de l’une : 102a
La femme lui est enfrune
Et l’enfant plour lui demaine.
150 Paresce l’asne pourmaine,
Le commun male fortune.
Joseph qui ce nous ensaigne
Servit a ceste compaigne.
Tout temps fut sa vie brune[3],
155 Pour ce n’ot feste qui taingne.
Chascun a ce garde praingne
Et aussi face chascune
S’ame est en ciel comme est une
Des autres. Vaigne qu’avaingne,
160 Tele vie est incertaine
Et plus pale que la lune.
Trop de telz exemples sçay,
Car veu ay
Mains juges, mains gouverneurs
165 Gouverner par bon essay
De cuer vray,
Et mains terriens seigneurs.
Mais contr’eulx couroit clamours
De braieurs
170 Et chetis. Si monstreray
Et diray[4]
Que puis en ont eu doleurs
Car maint se sont sanz delay
Ne esmay
175 Departi par telz crieurs,
Dont veu bien advenir n’ay,
Fors que j’ay
Veu conquerir honeurs
Maintefois aux departeurs,
180 Qui ailleurs
Avoient proufit et glay.
Si crieray
De telz peuples les foleurs. 102b
Car quant ceuls qui gouvernoient
185 Se partoient,
Un autre aprés eulx venoit[5]
Dont cent fois plus se plaingnoient,
Et disoient
Que cilz la les honnissoit,
190 Et le premier regretoient
Et crioient
Pourquoy on ne le mandoit.
A bon droit,
Au destroit,
195 De leur foleur se doubtoient.
Adonques le congnoissoient
Et plouroient
Le meschief qui leur sourdoit,
Quant leurs terres s’i perdoient,
200 Et Veoient
Que remedes n’y estoit.
Chascun adonc le plaingnoit,
Et plouroit
La perte que fait avoient.
205 Pour ce doit ou bien garder
Et louer
Homme qui scet gouverner,
Sanz lui mouvoir nulz descours,
Qu’om ne le puet recouvrer.
210 Mal ouvrer
Contre lui et dur paler
En a fait maint aler hors,
Que l’en veoit par effors
De son corps
215 Depuis terre conquester
Et autres par sens regner,
Qui est precieus tresors.
Peuple, enfant, femme ordonner
Puet grever. 102c
220 Ne scevent considerer
Leur bien, tant est leur sens tors.
Si les fait bon eschiver
Et aler
On l’en puet son bien trouver
225 Sanz telle paine, car lors
Vit l’en en joieux depours,
Sanz rappors
Mauvais que l’en doit doubter,
Et nulz ne doit convoiter
230 Service dont ilz soit mors.
Ci fineray temprement
Mon lay dont l’enseignement
Vueilles en bien retenir.
Et vous plaise a abstenir
235 D’asservir
Si faitement
Vostre corps crueusement :
Vraiement,
C’est le mieulx a mon desir.
240 Gouvernéz vous nettement
Et vivéz joieusement
Et veuilléz Dieu requerir
Qu’il nous doint vivre et mourir
Et chevir
245 Si sainctement,
Qu’en ciel pardurablement
Bonnement
Ou lui nous face venir,
Amen.
[1] Saint Hilaire corrige en tant
[2] Ms. lui occire
[3] Ms. bonne
[4] Ms. monstreray
[5] Ms. veuoient
