Lay 9 : Lasse, de fort heure nee (CCCXII)
IXe Lay
Ci commence le lay du tresbon connestable B. du Guesclin
Lasse, de fort heure nee, 97a
Fortunee
Et mal menee,
Esgaree,
5 Triste, dolente, esplouree,
Plaine de dolour,
De tristour
Et de plour,
Dame de toute langour,
10 Que n’est ma vie finee !
Quant jadis fu assenee,
Honouree
Et bien amee,
Fort doubtee
15 De plus vaillant cuer qu’Enee[1],
Qui en toute honnour,
En valour,
Sanz faulx tour
De prouesse et de baudour
20 Surmontoit toute contree.
Car en largesce passoit
Alixandre et surmontoit
En sa prouesce Achillés,
Plus doulz que Paris estoit,
25 Et en mer se gouvernoit[2]
Mieulx qu’onques Dyonidés.
Ce fut Cesar en ses fes,
Qui tant fist de beaus conquests.
A Josué ressembloit.
30 Terre devant lui trembloit
Tant fut chevaliers parfés.
Pour son seignour conqueroit.
Les cuers des bons attraioit,
Mainte terre mist en pes,
35 Des couars hardis faisoit,
Tout le monde le suivoit 97b
En criant : « Tenons de prés
Le plus vaillant de jamés,
Qui conquiert pais adés
40 Et ce qui perdu estoit. »
Car esbahis est qui oit
Ce qu’il dist et fist aprés.
Que fist il ? ― Des sa jeunesce,
Sanz paresce,
45 Hardiesce
Fut en l’aigle d’Occident.
Certes mainte grant prouesce
Que je lesse
Pour la presse[3]
50 De dire que mes cuers sent.
Il portoit l’escu d’argent
A la noire aigle plaisant
Qui a deux testes se dresse
A un baston qui s’adresse
55 De gueules en traversant.
Il ne doubta onques presse.
Sa noblesce,
Sa haultesce
Et ce qu’il faut diligent
60 Fist prandre mainte fortresce[4],
Car l’adresce
De largesce
Fut certes sur tout gent
[…]
65 Il servit premierement
D’Orleans duc et duchesse.
La Roche ot de leur richesse,
Tesson heritablement.
La terre et tout lui donna
70 Le Duc et habandonna
Pour ce que bien l’ot servi.
Et li prodoms s’avança, 97c
Qui a Meleun commença,
A l’assault forment s’offrit[5],
75 Et tant de paine y souffrit
Que d’illec l’en apporta
Comme mort. La se monstra
Et la fut son premier cry.
Depuis gens d’armes mena,
80 Pluseurs grans fais acheva,
Par tout fut son nom chieri.
Les Anglois fort dommaga
Et de leur orgueil vanga
Les François, je vous affy.
85 Maintefois les desconfy
En bataille et surmonta,
Et le Captal conquesta
En Normandie autressi.
Aprés fut il en Bretaigne
90 Contre Montfort, soubz l’enseigne
Du saint prodomme de Bloys.
A la bataille grevaingne
Prinsonnier. Puis en Espaingne
Mena Gascons et Anglois,
95 Du royaume a celle fois
Getta les gens de compaingne :
Ce fut le droit capitaine
De tous, tant estoit adrois.
Querre fist dure et haultaine
100 Au roy Pietre et son demaine
Pour Henrry, qui fut destrois
D’une mort laide et villaine,
Dont Pietre ot puis malestraine.
Mais le prince des Galoys
105 Pour Pietre o les Guiennoys
Vint et o ceuls d’Acquitaine,
Qui fist bataille en la plaine
Et desconfist les François. 97d
Mais a la desconfiture
110 Qui fut dure
Dolente, male et obscure
Fut li prodoms prinsonniers,
Pour qui tant de mal endure,
Car trop dure
115 Ot lardure
Pour ses gens. Mais tout premiers
Demoura. De leurs deniers
Au raensonner mist sa cure,
Sanz refuser creature,
120 Puis yssit de leurs dangiers.
Arrier prinst son adventure.
Tant procure
Qu’en Espaingne o grant froidure
Ramena ses souldoiers,
125 Et conquist jusqu’a Esture :
Rien ne dure,
Ne n’endure
Ses gens, ne leurs assaulx fiers,
Pietre print li bons guerriers,
130 Et Henrris li queurt dessure,
Qui l’occist a demesure.
Roy le fist li chevaliers.
La fut Espaingne conquise,
Castelle et Galice mise
135 En sugeccion nouvelle.
En Arragon fist s’emprinse
Ou mainte fortresce a prinse.
Partout court de lui nouvelle.
Navarre ne se revelle,
140 En brief temps l’avoir soubmise.
Les mons passa sanz faintise :
La son pouoir renouvelle :
Du pais ot grosse mise.
Un messaigier lui divise 98a
145 Que France a secours l’appelle,
Et que les Anglois pourprinse
Ont la terre et la pourprinse.
Lors delaissa sa querelle.
Adonc ses gens amoncelle.
150 N’i quist autre convoitise,
Au Roy vint faire service,
Lors fut sa venue belle.
Par Guienne o ses effors
Aida a prandre mains fors
155 Le souverain combatable,
Mais li Roys Charles pour lors
Le manda et de son corps
Voult faire son connestable.
Moult fut a tous agreable :
160 A Paris dedenz et hors
Venoit chascuns, droiz et tors,
Conjoir l’omme honourable.
Car c’estoit tout leur confors :
Gransson, Canole defors
165 Estoient moult redoubtable.
Par villes, chasteauls et pors
Les chaça comme on fait pors,
Et c’est chose veritable
Qu’en bataille trespenable
170 Furent desconfis et mors.
Et par ce furent ressors
Normans de paine grevable.
Or recommença la guerre
Des François et d’Angleterre
175 En Guyenne et en Gascongne.
Engouslesme ala conquerre,
Poitou, Xantonge, et requerre
Es pays mainte besongne.
Ne prisoit une escaloingne
180 Fort, ville, chasteau ne terre. 98b
Tout d’assault prant ou aterre,
Se n’est qui de gre lui doingne.
En Bourdelois voult conquerre
[…]
185 N’est nulz qui ne le ressaingne,
Aux portes de Bourdeaulx erre,
Tout raençonne. Clef ne serre
Ne le tient jusqu’a Baionne :
L’un se rent, l’autre se donne,
190 L’un fait prinson, l’autre enserre,
L’un combat et l’autre enferre,
L’un met hors et l’autre essoingne.
Ainsis conqueroit pais.
Chacuns estoit esbahis
195 Du grant fait de sa conqueste :
Lors fut d’Envie envahis
Et devers la court trahis
(Envie est trop male beste).
Telz clignoit vers lui sa teste
200 Duquel il estoit hais,
Qui se faingnoit ses amis
Par faintise deshonneste.
Si fut par longtemps remis,
Dont li regnes fut mal mis
205 Quant il delaissa sa queste.
Lyéz furent ses ennemis.
De son conquest ont conquis,
Dont ilz faiss[o]ient grant feste.
Helas ! Ce fut grant tempeste
210 Pour toutes les fleurs de lis !
Trop fut faulx, vains et faillis
Qui esmut si grant moleste.
Toute desolacion,
Guerre et tribulacion
215 Fut ou regne a sa venue,
Mais sa consolacion
Mist par provision 98c
Le peuple et la gent menue.
La guerre leur a tollue
220 Et gardé d’oppression,
Dont toute leur orison
Estoit par lui espandue.
Que fist il une saison
En Normandie ? Raison
225 Est qu’elle soit entendue.
Quans fors a sugeccion,
Dont le Roy possession
Ot devers lui retenue,
Mist il ? La chose est sceue
230 Par toute la region.
D’Evreux la[6] dominion
Fut au Roy Charles rendue.
En munde, en terre et en mer
Fist tant qu’om le doit clamer
235 Des chevaliers pere et preux.
Partout fist son nom nommer,
Si le doit chascun amer,
Qu’a son dessus fut piteux,
A ses ennemis crueux,
240 Et voult la guerre mener
Pour son seigneur, et finer
Comme fors et courageux.
En Languedoc voult aler
Ou l’en veoit tout gaster
245 Par les ennemis doubteux
Sanz nul remede trouver.
Par Auvergne acheminer
Se voult le cuers vertueux.
Fors se rendent deux et deux
250 Trop le porent redoubter.
Mais mort qui veut tout dompter
Le prinst : la mourut touz seulx.
La fina Honeurs sa vie, 98d
La mourut Chevalerie,
255 La fut Vaillance perie,
La fut Foys ensevelie,
L’an mil .ccc. quatre vins.
La fut notable sa fins.
La fut sa parole oye,
260 La disoit a sa maisgnie :
« Servéz le Roy, je vous prie,
Le peuple n’oubliéz mie.
Je seray tantost estins,
Je m’en vois de pechié tins,
265 De grans miseres afins.
Or soit Dieux en mes chemins
Et la mere aux orphenins,
La douce Vierge Marie,
La dame que je supplie.
270 Trop en ce monde me tins
Ou il n’a que larrecins.
Dame, trop y ay mesprins.
Merci vous crie Guesclins
Qui en saincte foy desvie.é
275 Lors fu je toute esbahie,
Qui cent foiz le jour le crie.
Mors l’a moins tué qu’Envie.
La fausse garce haie
L’espioit par les chemins.
280 Par elle fut de Mort prins
L’esleu sur toute lignie,
Qui mainte terre a cerchie
Et la mer a reverchie,
Dont il convient que je die.
285 Par tout couroit comme uns lins
Du monde li pelerins,
Li plus vaillant des Latins
Que mon chevalier retins
Et en prouesce maintins, 99a
290 Qui toute guerre a fournie,
Bertrans, que renoms escrire,
Grant departeur de lopins.
En .lx. et dix hutins
Mortelz, sanz gaiges comprins,
295 A esté li vrais cuers fins,
Pour quoy j’ai chiere palie.
Nature en suis forsenee,
Acouree,
Tourmentee,
300 Chetive et descoulouree.
C’estoit le meillour,
En amour,
En douçour
Sanz cremour,
305 En puissance et en vigour
Qui peust venir en armee.
Pour ce maudiray l’annee,
La journee
Destinee[7]
310 Qu’Envie et Mort fut trouvee,
Qui par leur rigour
M’ont en plour
Par faulx tour,
Sanz retour,
315 Mis, et a mon dernier jour,
Sanz joie avoir recouvree.
Cy fine le Lay du tresbon connestable Bertran du Guesclin
[1] Ms. que nee
[2] Ms. mieulx se gouvernoit
[3] Ms. paresse
[4] Ms. forteresce
[5] Ms. souffrit
[6] Ms. le
[7] Ms. Et destinee
