Lay 6 : Depuis que j’oy entendement (CCCIX)
VIe Lay
Ci commence le lay des douze estas du monde
Depuis que j’oy entendement
Et que j’aprins premierement
Lettres pour science sçavoir,
Je pensay treseparfondement
5 Au monde et au gouvernement
Qu’il puet de jour en jour avoir.
Et lors me fist raison mouvoir
.xii. estaz qui communement
Gouvernent et sanz leur sçavoir
10 Ne puet cilz mondes recevoir, 79c
Ne nulz homs, estat plainement.
Clergie est le commencement
De ces .xii. qui proprement
Nous fait les choses concevoir
15 Du temps passé et du present.
Chevalerie aprés se prent.
Le laboureur fait son devoir
De labourer. Juge a pouoir
De garder loy et jugement
20 Au peuple. Fevre fault pour voir
Forgier pour les ars esmouvoir
Au commun edifiement.
Marchant pour aler et venir
Fault, denrrees aler querir
25 Et pour pluseurs finances faire
En divers lieus, pour secourir
Aux chevaliers et maintenir
Le peuple en plus joieux affaire.
Hoste fault qui soit debonnaire
30 Pour recevoir et pour tenir
Les passans et pour eulx offrir
Ce qui leur sera neccessaire.
Or fault, pour la guerre civile,
Advocat clerc qui soit habile
35 Pour le droit des gens demonstrer
Aux juges en chascune ville.
Notaire fault qui, entre mille,
Soit saige et loyal pour garder
Tous instrumens et les former
40 Des contraulx par voie soutille.
Medicin pour les maulx curer.
Prestre pour lire et pour chanter.
Et Roy qui ait noble concile.
De tous ces .xii. estas mondains 79d
45 Ay je voulu estre certains
Et sçavoir par experience
De chascun, de l’un plus ou moins[1],
Mais pou en y voy qui soit sains.
Il a grant labour en science
50 Avant qu’om l’ait, et conscience
Fault bonne a ceuls qui en sont plains.
Chevalerie a grant soufrance
Qui du peuple a cure et deffense,
De la loy Dieu et de ses sains.
55 Les laboureurs euvrent des mains
Pour les Roys et leurs souverains
Et leur paient leur redevance.
Tous les jours sont aux champs empains
Comme bestes, claméz villains,
60 Et telz gens ont moult de meschance.
Et les juges pour leur puissance
Doivent garder, et sont abstrains,
Le peuple et la loy sanz offence,
Pugnir les mauvais sanz doubtance :
65 Ce doivent ilz faire du mains.
Fevre convient, je n’en doubt mie,
Pour tous ars, pour charpenterie,
Pour faire tout mondain ouvrage.
C’est le premier, selon clergie,
70 Sanz lequel maison ne navie
Ne puet estre ne maçonnaige,
Drap de soye ne labouraige,
Robe, jouel, chose jolie,
Guerre, deffense ne usaige,
75 Poisson, oisel, beste sauvaige
Ne nulle haulte euvre entaillie.
Du marchant est ja esclarcie
La paine et de l’ostre en partie,
Leur estat, leur paine et usaige. 80a
80 De l’advocat et de sa vie
Qu’il se doit garder qu’il ne die
Mençonge, soit loial et saige.
Du notaire ay dit mon langaige
Qui estre doit sanz villenie.
85 Medicin fault qui assouaige
Les maulx des gens, sanz nul oultraige,
Qui soit expers, de bonne vie.
Or convient il estat de prestre :
Saige et discret le convient estre
90 Pour la loy garder a chascun,
Qui doit tout le peuple represtre
Des commandemens Dieu, et pestre
Du saint sacrement le commun,
Et les doit ouir un a un
95 Leur confession et leur estre
Tant qu’il les puist mettre a la destre
Du filz Dieu qui n’est pas enfrun.
Roy terrien fault qui soit masitre
Et n’ait condicion senestre.
100 Cilz doit estre plain comme un flun
De pité ou elle doit nestre.
Aux desloyaulx doit le chevestre
Sanz espargnier l’autre ne l’un,
En guerre doit a l’acier brun
105 Son peuple garder com bon pestre,
Faire bien comme si ancestre,
Et n’ait condicion de prun.
Paine et labour en tous [les] cas
De ces .xii. mondains estas
110 A tresgrant, tresmale et tresdure
Mais j’apperçoy que li plus bas
Est au jour d’ui [et] li plus las
De la guerre a cil qui l’endure, 80b
Plain de pechiéz, de toute ordure,
115 De larrechins et de debas,
De nuire autrui contre droiture,
De faire contre l’Escripture
Plus de maulx que ne fist Judas.
L’en destruit tous les pais plas,
120 L’en fait ses subgiz estre mas,
On prant toute leur nourreture,
Poz, paelles, chevaulx et draps,
Bestaulx, poulaille, leur hernalx
Sans paier. L’en leur fait injure.
125 On gist aux champs, a la froidure
Pour mal faire. On destruit, helas !
Son corps, s’ame qui tousjours dure.
Foulz est qui de tele vie dure
Entreprant, dont li corps est cas.
130 Vaillans se dient chevalier
Au jour d’ui pour tout exillier
Et courre sur Dieu et l’eglise.
Estables font de son moustier
Les pluseurs et s’i vont logier.
135 Toute chose est leans de prise.
De Dieu gardent mal la franchise.
On en a veu maint trebuchier.
C’est une dolereuse emprise.
L’oneur Pompee en fut jus mise :
140 Nul ne doit tel guerre avoir chier.
Encor quant ilz vont chevauchier,
L’un court devant, l’autre derrier.
Ja n’y ert ordonnance mise.
En peril sont li fourragier.
145 Avantgarde n’y a mestier,
Guet de nuit, escoute n’avise,
Pour garder l’ost. Chascun se prise,
Ses ennemis veult desprisier.
Le charroy, la vitaille est prinse. 80c
150 Et ainsi par fole entreprinse
Fait moult telz osts a desprisier.
Chascuns s’esmuet a la volee
En mandement et en armee
Pour dire que g’y ay esté.
155 Mais non obstant [la] leur souldee
Y a mainte chose robee,
Et maint homme en poste bouté
Qui petit vault. Trop a cousté
Tele muete desordonee
160 A maint qui en fut rebouté
Et qui puis en fut deserté
Et moult destruite sa contree.
Tant qu’on a viande aprestee
Sanz la conquerir a l’espee
165 On faut trop bien le bel amé[2].
Mais quant pain fault une journee
Et il pluet une matinee,
On dit : « L’ost sera affamé. »
On gist a plain, c’est tout gasté :
170 Faire veulent la retournee.
C’est la maniere de l’alee
Qu’on fait en yver sanz esté.
S’on ne pense a provision
De son ost, n’a l’election
175 Des anciens saichans la guerre.
On demande l’oppinion
Aux clers, aux jeunes, puis cri’on
Quant on n’y scet remede querre.
Le premier conseil tout enserre :
180 Pour quoy donc ne les appell’on
Au premier pour leur sens acquerre,
Quant au derrain l’en fault requerre
Par necessité, vueille ou non ?
Assaillir veulent sanz raison 80d
185 Ville fort, chastel ou maison
Sanz trait, sanz habillement querre
Et guerrier sanz la saison,
Et ainsis donnent achoison
Aux ennemis d’eulx mettre a terre.
190 Telz gens n’ont c’un coup ne c’un voirre.
Tost commence on[3] et tost laiss’on.
De trop pou nous esjouisson,
De petit peu li cuers nous serre.
Et quant uns fors est assailliz,
195 D’escu et de lance failliz
Est legierement, et bleciéz
Sont ceuls dont il est envahiz,
S’en sont ceuls de l’ost esbahiz
Et pour bataille refouléz.
200 La puet estre telz affoléz
Dont pluseurs fussent desconfis
Et dedenz la bataille oultréz,
Et maintes gens reconfortéz
Qui sont par telz assaulz honnis.
205 Ceuls qui ont les regnes conquis
Le temps passé ont honeur quis,
Autrement se sont gouvernéz
Empereurs, Roys, contes, marquis,
En temps d’esté tenu logeis
210 Et en yver sont retournéz
Et leur establiz ordonnéz
Jusqu’au temps chaut qui est garniz
D’erbes, d’avoines et de blez.
Lors furent leurs sieges gettéz
215 Et assiegiéz leurs ennemis.
Et puis que je voy a rebours
Aler sanz armes et amours,
En grant paril d’ame et de corps
Et que de tous est il piours 81a
220 Le mestier d’armes et plus lours
Des estas du monde, j’acors
Que je m’en mettre du tout hors,
Car je n’y voy bien ne secours
Fors desloiauté et faulz tours
225 Et trop pis que je ne recors.
Il fault estre muiaulx et sours.
A clergie auray mon recours.
Qui suit ceste guerre, il est mors.
Il n’y a que tristesce et plours,
230 Faim, froit, soif, toute deshonours,
Peril d’ame, tous desconfors,
Destruire le corps qui est fors
Et soy affoler tous les jours.
Rien ne vault d’armes li effors.
235 Au jour d’ui ce n’est c’uns ressors
De larrecins et de doulours.
Pour ce a Dieu guerre comment
Ou il n’a fors que tourment
Sanz nulle honour percevoir
240 Fors toulte et ravissement,
Ardoir, gaster son parent
Et son prouchain decepvoir,
Et en convoiteux vouloir
Perseverer longuement,
245 Pour cuider grant apparoir
Et sur les autres paroir,
Pour pechier si mortelment.
Les preux firent autrement,
S’en ont pardurablement
250 Le renom qu’om puet veoir,
Car tout leur entendement
Fut aux vertus proprement :
Des vices ne furent hoir.
Des maulx se vouldrent doloir 81b
255 Et les pugnirent griefment.
Pour ce orent ilz grant pouoir.
Moult doit li mondes doloir
D’iceuls le trespassement.
Explicit le lay des.xii. estas du monde
[1] Saint Hilaire corrige en mains
[2] Ms. anue
[3] Ms. l’en
