Lay 3 : Contre la saison nouvelle (CCCVI)
IIIe Lay
Ci commence le lay amoureux qui est moult bel et gracieux
Contre la saison nouvelle 72b
Qui toute amour renouvelle,
Pour mon cuer renouveller
Vueil en ce doulz mois aler,
5 Et, pour l’amour de la belle,
Ouir la douce nouvelle
De l’amoureus temps et cler.
Je voy may qui renouvelle.
Le doulz rossignol m’appelle.
10 J’oy l’alouette chanter,
Tous oiseaulx joye mener,
Le tarin, la teurterelle :
Je voy venir l’arondelle
Qu’om doit amours reclamer.
15 Je voy les boys et les buissons
Resjouir, et les oysillons
Faire leurs doulz amoureus chans.
Je voy les bestes, les poissons
En ce doulz temps faire leurs sons.
20 Reverdir les prez et les champs.
Je voy ceuls pour l’iver meschans
Relever de leurs marrisons.
Je voy amer les nonsachans.
Je voy les petiz et les grans
25 Lors dire : « Or nous resjouissons. »
Je voy fueilles, flours et boutons,
Douces odeurs que nous sentons.
Je voy rosiers rouges et blans,
L’aubespine que nous querons,
30 L’esglantier que nous odorons,
Les belles fontaines courans,
Les douces roses odorans,
L’erbe vert que nous desirons,
Les chesnes qui portent les glans,
35 Les doulz flajoléz ressonans
Que des selves des boys faisons. 72c
Les bois, les prez, les champs, la terre
Seulent nouvelle robe querre
En ce doulz mois plain de verdure.
40 Adonc mainte flour se desserre[1]
Que chascun doit joieus requerre
De mainte couleur nette et pure,
Blanche, inde et perse par nature :
La fouchiere dont l’en fait voirre
45 Et chapeaulx, qui en veult enquerre,
L’argorrie qui n’est pas sure,
La marguerite nette et pure,
Et le glay, qui le veult acquerre.
La fault du temps d’yver la guerre
50 Et en France et en Angleterre.
La vient la joieuse pasture
Des amans. Joie et deduit erre
Ce jour de may vont a grant erre
Chascuns querir sa nourreture :
55 C’est amour qui de mal n’a cure.
Dangiers pert sa clef et sa serre.
Paour le vaint, Pitié l’enserre.
Du vergier se fait l’ouverture.
A ce saint jour qui petit dure
60 Doit l’un de l’autre amour porquerre.
Pour ce voit on princes et Roys
Le premier jour de ce doulz mois.
Chevaliers, dames, pucellettes,
Escuiers, clers, lays et bourgois
65 Pour leurs amours gens et adrois,
Et aler cueillir les flourettes
Perses, bleues et vermeillettes
Et faire chapeaulx par les boys
Et les donner a ces fillettes
70 Qui ont ces dures mamelettes
Et qui chantent a haulte vois
Ces amoureuses chançonnettes
Gracieuses, plaisans, doucettes.
S’onques n’amas, lors amer dois.
75 Car quant d’elles les doulz chans ois
Et du doulz roussignol la vois,
Il convient qu’a amer te mettes.
S’aveugles n’yes, d’autre part vois
Joustes, festes, dances, convois,
80 Compaignies plaisans et nettes,
Amis, amans et amourettes
Par tourbes, cy .iiii., ci trois,
Corner, dancer les joliettes
Et cueillir may et violettes.
85 La doit chascuns estre courtois
Et d’amours requerir les debtes.
La soient aliences faittes
Des amours dont l’en est destrois.
Ainsis qu’a ce doulz may pensoie
90 En mon lit ou je sommeilloie,
La nuit dont fut le lendemain
Ce jour de may, je resgardoie
En un bois ou je cheminoie,
Ce me sembloit, un grant villain
95 Qui tint un baston en sa main
Et me demandoit ou j’aloie
Ne que laiens faire vouloie.
Pluseurs l’appelloient Desdain.
A mon chaperon mis ma main
100 Et de l’onourer me penoye
Pour ce que grant desir avoye
De veoir ce lieu plus a plain
Et la grant feste que j’oyoye.
En requignant dist : « Va ta voye,
105 Tu n’y entreras pas demain. »
Oultre passay faisant grant joye.
Et ainsi com je cheminoye
En un pre, sur la bonne main, 73a
Dessoubz un pin hault qui verdoye,
110 Ou fontaine ot plaisant et coye
Et une ruisseau cler, net et sain,
Vy un seigneur tressouverain.
Comme dieu cellui aouroie,
Car en l’air tout seul le veoie
115 Resplendissant, de douçour plain.
Et dessoubz le pin, sur le plain
D’aventure mes yeulx avoie.
La vi gens que je n’y sçavoie
A genoulz faire a Dieu leur clain,
120 Requerans que leur priere oie
Et que sa grace leur envoie
Et s’amour au secle mondain.
Lors pour mieulx veoir la convine
Me mussay soubz une aubespine
125 Et vi que cilz dieux leur donna
Dame et seigneur en une eschine.
Hermofondricus le decline.
Cilz dieux ainsis le destina.
Moitié homs et moitié femme a[2].
130 Et leur dist : « Cest amour encline
A tous .ii. que je vous destine
L’un et l’autre vous formera,
Et sanz lui nulz homs ne pourra
Avoir sens ne bonne dotrine,
135 Vaillance, honeur ne discipline,
Ne parfais jamais ne sera
En renom qui cestui n’ara :
Or gart chascuns qu’il s’i encline. »
Descendre vi celle amour digne
140 En un char de feu sanz courtine
Tout ardant, qui fort m’espenta.
Entour ot un pou de bruine.
Ceulx qui du recevoir indigne
Ne furent, en eulx se bouta, 73b
145 Soutivement les embrasa.
La fut la belle Proserpine,
La fut Medea la meschine,
Theseus, Hercules fut la,
Jazon qui par amours ama,
150 De Babiloine la roine
Semiramis, Panthapoline,
Paris qui Helaine admena,
Agamenon guerre en mena.
Troye en fut depuis orpheline.
155 La fut encor, ce m’est advis,
Salemon, Ovide, Davis,
Deyphile, Panthasillee.
Aristote y sembloit tout vis,
Virgiles et Vertigeris.
160 La fut presente Bersabee.
De Cartaige y fut couronnee
Royne Dido. De tous pays
Avoit gens a celle assemblee
Mainte prouesce racontee :
165 Guenievre, Yseult y ont leurs dis,
Tristans, Lancelos li hardis,
Maint prodomme d’autre contree
Qui ont mainte chose comptee
Par amours des faiz de jadis.
170 Certes moult seroit esbahis
Qui touz leurs faiz verroit escrips,
Leur prouesce et leur renommee
Et les grans faiz qu’ilz ont empris,
Passer les mers, regnes conquis,
175 Ceuls qu’ilz ont soubzmis a l’espee.
Et ceste prouesce louee
Vint toute d’amours, ce m’est vis.
Clergie aussi en fut domptee.
Honeur en vient. Qui la ne bee,
180 Il est maleureus et chetis, 73c
Lasches, foulz et acouardis.
La fut bien ceste amour monstree,
Et depuis qu’elle fut laissee
Ont esté mains regnes peris.
185 Et adonques disoit Honours,
Qui avoit un chapeau de flours,
A Jeunesce : « Je te commande
Que tu ne soies sanz amours.
Aime fort, poursui les meillours,
190 Car amer et poursuire amende.
Je seray avec toy presente,
Ne te doubte ja de faulx tours.
Tu aras largesce de rente
Et Vaillance aussi te presente.
195 Prouesce sera tes recours.
Qui est paresceus, il est lours.
Nulz ne puet avoir bonnes mours
Se d’amer ne tient droitte sente.
Qui bien aime, pas n’est rebours,
200 Mais gracieus, de beaus atours.
Et fault que de bonté se sente,
Face a droit et pas ne se vente,
Et ne lui plaise oiseux sejours.
Aux dames gracieus se rende
205 Et a toute prouesce tende :
De mieulx en mieulx face tousjours.
Entr’eulx parlent de vassellaige,
De Troye la grant, de Cartaige.
De Thebes ont grant plai tenu,
210 D’Athenes et du grant couraige
D’Alixandre et du hault paraige
Des Roys qui sont d’amours venu.
De Romme leur est souvenu,
Du Roy Priant, de son linaige,
215 Du Roy Belus, de[3] son ymaige
Et de ceuls qui ont conqueru 73d
Par amours terre et heritaige.
Chevalerie par usaige
Vient d’amours, et soubz son escu
220 Se fait tout loyal mariage.
Paix en vient, guerre en assouaige :
Sanz amour n’a nul bien vescu.
Regardons que l’umain linaige
De son pechié et de l’outraige
225 Par le premier pere offendu
Fut par amour et par son gaige
Reparé, sauvé ce dommaige.
Vray amour adonc nous tollu
Le mal qui nous fut advenu :
230 N’y valoit autre vasselaige.
Il n’estoit lors ne foul ne saige
Qui n’alast dedenz la palu
D’enfer prandre son herbergage,
Quant Amour s’en mist en hostaige
235 Qui tant nous vault et a valu
Que toute dolour assouaige,
Humble cuer met en hault estaige :
Qui pert amour tout a perdu.
« Certes, dist adonque Vaillance,
240 Maint royaume sont en balence
Et tout par le default d’amer.
Po voy de present qui s’avance
Fors a convoiter des s’enfance.
Amour convertit en amer.
245 Convoitise a fait une mer
Ou chascuns veult peschier et panse
D’amasser joyaulx et finance.
Amour fait de touz poins cesser.
Pour ce voit on entr’eulx regner
250 Orgueil, Haine, Decevance,
Mesdit, Deshonnour, Desplaisance, 74a
Guerre l’un a l’autre mener,
Sanz raison tollir, raensonner.
En amour n’ont nulle plaisance.
255 Ainsis vit en desordonnance
Ce monde qui doit brief finer. »
La fut ancienne Plaisance
Qui du bien fist ramentevance.
Poursuite commence a plourer.
260 Deduis a une part se lance.
Loyauté a dire commence
Qu’elle ne scet ou demourer.
Verité ne pouoit parler.
Justice n’ot escu ne lance.
265 Raison, Equité, Atrempance
Ne scevent quele part aler.
Pité commence a souspirer.
Raison disoit : « Je n’ay puissance,
Maniere fault a contenance.
270 Nulz ne veult Amour recouvrer.
Ce jeune monde deserter
Verréz pour ce en desordonnance.
Fy d’or, d’argent et de chevance
Qui font toute joie cesser ! »
275 Adonc d’illec se departirent,
Au Dieu d’amours graces rendirent
Au partement[4] de celle place
De ce qu’a leur temps ne perdirent
Bonne amour, les vertus acquirent
280 Et les royaumes. Chascuns glace
En acquerant. Largesce passe
Des gens qui aprés nous venirent
Et les presens po de bien firent.
« Je vous pri que sçavoir leur face,
285 Dist Honours, afin que no trace
Suient, laquele ne chierirent
Onques encor, et qu’ilz se mirent 74b
D’or en avant en nostre face
Qui toute convoitise efface,
290 Que li bon ancien chierirent. »
Nulz a Honeur ne contredirent
En passant grant paour me firent.
Mais li dieu qui po se soulace
Et ses gens ou buisson me virent
295 Soubz l’ausbespin[e]. Lors ilz dirent
Au dieu d’amours : « Vez la Eustace
Qui doit bien estre en vostre grace :
Guillaume et lui noz faiz escriprent.
Venus et Juno les nourrirent.
300 Command »z lui de ci s’en passe,
Die tout et rien ne trspasse
Comment ancien se maintinrent
Aux presens. » Lors s’esvannouirent.
La convint que je m’esveillasse
305 Et que l’endemain racontasse
Aux amans ce qu’ilz m’enjoingnirent.
Lors me levay et prins ma selle,
Anque et papier, et la querelle
Du Dieu d’amours enrregistrer
310 Voulz, et le jour de may porter
Au boys lez une fontenelle
Ou mainte dame et damoiselle
Furent pour leur corps depporter.
La virent bien qu’Amour chancelle
315 Se chascune n’a cuer en elle
Et chascuns pour la ramener.
Or y vueille chascune ouvrer
Et chascuns si, qu’om la rappelle,
Car par l’amoureuse estincelle
320 Se puet ly mondes reformer.
[1] Ms. desserre desterre
[2] Ms. femma
[3] Ms. et de
[4] Ms. departement
