Lay 2 : Genievre, Yseult et Helaine (CCCV)
IIe Lay
Cy commence le lay du desert d’amours
Genievre, Yseult et Helaine,
Palas, Juno ne Medee,
Du Vergy la chastellaine,
Andromada ne Tisbee
5 N’autre dame trespassee,
Ne nulle vivant mondaine,
N’orent le mal ne la paine
Ne la dure destinee 70a
Qui d’amours m’est destinee,
10 Dont pale sui, triste et vaine.
Car jadis en la fontaine
De Narcisus fu trouvee
Fresche, coulouree et saine,
Jeusne, gente et desiree,
15 Requise, chierie, amee,
De beauté la souveraine,
Comme estoille trasmontaine
De toutes pars regardee.
Maint ont leur face miree
20 En moy, que tristesce maine.
En ce temps li Dieux d’amours
Son secours
Avoit et tous ses recours
En moy, qu’il tenoit pour fille.
25 A .xv. ans ma jeune flours
Ot honours
Et service des meillours.
Je fu en cel aage habile
Entre mille,
30 Plaisant, simple et po subtile,
Dont je faiz ci mes clamours.
Quant me souvient des bons jours,
Des sejours,
Des grans festes, des estours
35 Qui furent en mainte ville
Fais pour moy, et des bohours
Et des cours,
Des robes, des grans atours,
De dueil li corps me fretille.
40 Quant si ville
Me voy que nulz ne s’abille
Pour moy, je vueil fondre en plours.
En ce temps que je recorde, 70b
Tint cilz Dieux l’arc et la corde
45 Et le carrel amoureux
Dont maint furent trait sanz orde,
Detrait sanz misericorde,
Se ne fussent mes doux oeulx.
Mais mes regars gracieux
50 Firent puis du trait la corde
Par pitié, qui ne s’acorde
Que nobles cuers soit crueux.
Entre aucuns ot grant discorde
Pour m’amour. Maint se descorde,
55 Qui me voult amer tous seulz,
Sanz pouoir trouver concorde.
Mais honour qui tout racorde
Fist humbles les orgueilleux.
Mon renom fut precieux
60 De moy faut que charité sorde
Et que les tristes ressorde
Qui pour moy sont dolereux.
A ce temps chiere tenue,
En prieres maintenue
65 Fu, comme vray Deesse
D’amours. N’avoit soubz la nue
Dame qui tant fust cremue :
Chascuns m’appelloit maistresse.
Son cuer, sa tour, sa fortresce[1],
70 Son honour, son attendue.
Cuer et corps sanz retenue
L’un puis l’autre a moy delesse.
De sa Dame estre me presse
Sanz laide desconvenue.
75 Qui ne puet donner, il rue
A feste, a monstier, en rue.
Chascuns m’offroit sa richesce.
L’un en noir son habit mue 70c
Pour moy, l’autre de sang sue.
80 L’autre languist en tristesce.
L’un se meurt, l’autre se blesse.
L’un m’escript qu’amours l’argue,
L’autre tent a ma venue
Chançon de ma gentillesse,
85 De mon bien, de ma jeunesse
Qui depuis m’est chier vendue.
En ce bon temps de jadis
Fu en mondain paradis
D’amours, qui po me dura.
90 Mais de mains acouardis
Fis par ma grace hardis.
Et maint pour moy voyaga
Et son mal en bien changa.
En ce doulz temps que je dis
95 L’un fut gais, l’autre jolis.
Chascuns par amours m’ama
Et sa Dame me clama :
Je fu comme empereris.
Li doulz rossignolz gentis
100 Me chantoit ses chans soutis.
Tout deduit me compaigna,
Leesce o moy fut toudis.
Soubz ces beaus arbres flouris
Ou l’erbe vert verdoya
105 Mainte flour y undoya,
La fu. Mais mes grans amis
Qui en son vergier m’a mis
A nulz et lui mouvera,
A moy chierir laboura
110 De .xv. ans jusques a six.
Mais combien que maint m’amassent
Et priassent,
Et leur Dame ne clamassent, 70d
Et que tous les honouroie,
115 Ja soit ce qu’ilz m’escriassent
Et donnassent,
Et que trop me presentassent,
Riens d’eulx prandre ne vouloie.
Ains disoie
120 Que d’avoir nul ne curoie,
Ne tele ne me cuidassent.
Ainçois a tous ceuls donnoie
Bon espoir que j’aimeroie
Leurs faiz, mais qu’ilz se gardassent
125 Et doubtassent
Que honte ne pourchaçassent
[Et] tenir d’onneur la voie.
Maintes en sont qui amassent
Et entassent
130 Les joyaulx, et s’en soulacent
Quant d’eulx jeunesce desvoie,
Qu’aage et viellesce le chacent,
Et les passent
Des deliz qui tost trespassent.
135 Dont garde ne [me] prenoie
N’avisoie
S’en tele viellesce venrroie.
Espoir n’oy lors que moquassent,
Mais certainement cuidoie
140 Et tenoie
Qu’en verité demourassent,
Et n’osassent
Ceuls mentir qui trop fort glacent
Contre ce que j’esperoie.
145 Un seul en avoie amé
Et clamé
De cuer et de voulenté
Mon ami tressouverain. 71a
Foy, Amour et Loyauté
150 Lui porté
Et en toute humilité.
Mais j’ay travaillié en vain,
Car quant mon aage mondain
M’est un petit trespassé,
155 De moy s’est rendu lointain
En desdain.
A toutes dames m’en plain.
Et si l’ay tant honouré
Et a son bien labouré
160 Qu’il avoit honeur a plain.
Mon bon temps m’a po duré,
Sy mourré
En tristesce et maleurté :
Tresdolereuse me claim.
165 Qui m’a si tost amené
Et donné
.xxx. ans ? Mon aage est finé
De jeunesce. Ay cuit mon pain.
Viellesce d’ui a demain
170 S’a tout mon bon temps cassé.
Rien n’ay tenu en ma main.
Prinse a l’ain
M’a Folour. Je muir de fain
De ce que j’ay refusé,
175 Jeune, sote ou temps passé,
En doulz aage premerain.
Je n’ay plus doulz avril ne may,
Fors tout esmay,
Ne je ne sçay
180 Que je ne muir de desconfort.
En lieu de joie tout dueil ay.
Lasse ! ou iray
Ne que feray
Pour mon confort ? 71b
185 Ou desert d’amours vois au fort.
La mes dolens jours fineray
Et ma vie recorderay
Et demourray
En languissant jusqu’a la mort.
190 Et par ma foy, je m’i acort,
Car comme innocent fineray.
Onques en amours ne pensay
Que je delay
Je vous di vray
195 Fors honeur. Et pour ce a grant tort
Cellui a qui mon cuer donnay,
Car je l’amay
Et l’enseignay
Pour estre fort,
200 Et de Vaillance avoir l’effort,
M’a, de quoy je [trop fort] m’esmay,
Guerpi, dont jamais n’ameray
Ne ne croiray
Homme vivant, car sanz ressort
205 L’ay veu a autre avoir son sort,
Dont jamais lie ne seray.
Quant ceuls qui me seulent amer
Par leur dit, et Dame clamer,
Et ausquelz j’ay tant de bien fait
210 Sanz mal et sanz blasme penser,
Fors que pour leurs corps avancer,
Se sont envers [moi] tant meffait
Que chascuns son honeur delait,
Et leur voy sanz cause blasmer
215 Ce qu’ilz souloient honourer,
Ainsis Vaillance se deffait.
En pluseurs sanz raison de fait.
Pour jeune folie trouver
Veulent sanz cause reprouver
220 Le bien qu’ilz orent a souhait. 71c
Et quant je voy tel temps regner
Et que je ne puis recouvrer
Le premier qui se contrefait,
Et voy pluseurs renouveler
225 Et Loyauté dissimuler,
C’est ce qui ma pensee atrait
Ou desert d’amours et retrait.
La me fault mes bons jours finer,
Plaindre, gemir et souspirer.
230 La fault que repentence m’ait.
Viellesce m’a basti ce plait.
Pitié me fault. Amour me[2] lait,
Qui ne me veult guerredonner.
Jeusnes, vielles, cy regardéz :
235 De moy avéz un beau retrait[3].
Ne venéz pas en ce desert
Ou il n’a fueille, ne boys vert,
Herbe, fleur, fruit n’autre verdure.
Tout chant d’oisel y ert desert.
240 Fors que bruiere n’y appert,
Noif, gresil et toute froidure.
Esté fault la, l’yvers y dure
En tous temps. Celle le dessert
Qui amours en jeunesse sert
245 Loyaument. Ce desert procure
Ou je me treuve d’aventure.
Ma folie en ce lieu m’appert.
Li lieus est ses de sa nature,
Ou venir ne voy creature
250 Fors ceuls que fol amour aert.
En ce lieu ou je suis ne pert, 71d
Ne en obscur ne en appert,
Que tempest et male aventure.
Pensers et plours y sont appert
255 Et buissons d’espines couvert,
De rensses et de grief pointure,
La cahuant chante et murmure
Ses chans de mort. La sont ouvert,
La son mi pensers a descouvert.
260 La est tristesce en pourtraiture.
La vient la mort en sa figure,
Noire et hydeuse a moy s’appert.
Je n’atten que ma sepulture.
Mais mon exil en gré endure
265 De pacience recouvert.
Fontaine de plour sur ma fin
Soir et matin,
Sanz draps de lin
Treuve pour arrouser ma face.
270 Lasse ! plus ne suy au bacin
Net, cler et fin
Du doulz temps prin
Pour moy mirer : coulour m’efface.
Jamés la venir ne cuidasse
275 Ne si tost approchier. Or fin.
Lieux te[ne]breus me sont afin.
Ce me pourchace
Descongnoissance. or me soulace,
Car bien deffin.
280 Quant j’ay tenu le droit chemin,
Vray, enterin,
Par ou je vin
Du jeune temps en ceste place,
Sain est mon corps, blanc sont mi crin.
285 Ne craing devin
Ne mal engin : 72a
Dieux de moy sa voulenté face !
Je cuide avoir vescu en grace :
Dieux scet qui est bon pelerin.
290 En jonesce a trop de hutin,
C’est fole trace,
Et foulz est qui trop la pourchace
N’y est enclin.
Pour ce d’endurer me paine
295 Ce desert, qui fort m’agree,
Et qui a droit me demaine,
Quant j’ay la cause monstree
De ma dolente pensee,
La mutacion soudaine
300 De jeunesce, qui est plaine
De foleur desordonnee,
Et de maint homme qui bee
A faire chose villaine.
Garde chascune sa laune
305 Des loups, que ne soi plumee,
Ou jeune temps, et apprangne
Comment j’ay esté menee,
Tant que ne soit ramenee
En ce desert que j’ensaigne.
310 Aime honeur et honte craingne,
Ne soit a nul ahurtee
Mais sa jeunesce ordonnee
Franchement, quoy qui adviengne.
Cy fine le lay du desert d’amours
[1] Ms. forteresce
[2] Ms. ne
[3] Saint Hilaire note qu’on devrait retrouver ici les vers 217-220.
