Lay 1 : Trop me vient a grant merveille (CCCIV)
Et premierement commence le noble lay de Verité
Trop me vient a grant merveille : 67c
Je sommeille,
Et nul n’est qui me resveille
Ne qui me face veillier.
5 Et voy que mon sommeillier
Toutes gens nuit et traveille.
Mais toutefois que je veille,
Je conseille
Tout bien. Ne peut perillier
10 Qui son cuer veult traveillier
Par moy, qui n’ay ma pareille.
Avecques Dieu, nompareille,
M’appareille
Que chascuns avoir me veille.
15 Dieux me voult appareillier
Et aux Apostres baillier.
Ceuls m’orent en leur oreille,
En cuer, en bouche vermeille.
Nulz n’en deille.
20 Couronne, pour voir preschier,
Eurent, et pour empeschier
Les maulx que je desconseille.
Cilz Dieux, qui nous delivra
Des enfers, et s’enyvra
25 D’amour et d’umble pité,
Quant son corps pour nous livra
Et de son sang abuvra,
No povre fragilité,
Qu’Adam avoit endebté
30 Par orgueil, nous delivra
Par amour, par charité.
Joie et pardurableté
Humblement nous recouvra,
Par moy, Verité, ouvra.
35 Sanz moy ne se sauvera 67d
Nulz, car de necessité
Estre partout me faurra.
Et quant mes noms defaurra,
Ou qu’il sera en vilté,
40 Lors regnera Fausseté,
Desraison partout courra,
Guerre, Sterilité,
Traison, Desloyauté,
Nulz oir ne me vourra.
45 Je vins du ciel en la terre
Pour acquerre
Et requerre
Les peuples qui perissoient,
Et pour eulx monstre la serre
50 Qui desseurre
Cuer qui erre,
Et les pecheurs qui faloient,
Qui par pechié se lioient
Et aloient
55 Aux vices, qu’on ne doit querre,
Dont maint peuple fis conquerre,
Pour le voir que ceulx preschoient
Et monstroient,
Qui partout me soustenoient
60 Sanz paour, com fist saint Pierre.
Paix fut, par moy cessa guerre.
Dieu requerre
Et enquerre
Voldrent ceuls qui lors vivoient.
65 Leurs cuers, qui fut durs com pierre.
Fut comme yerre
Et com mierre
Ferme en Dieu : cellui doubtoient,
Honouroient
70 Et amoient. 68a
Et tindrent la juste esquierre
Et de mon droit sentier l’erre.
Et s’aucuns pour ce mourroient,
Liéz estoient,
75 Car Paradis conqueroient
Que nulz ne veult plus conquerre
Lasse de moy ! ne dorz mie,
Mais en pluseurs endormie
Sui, qui n’ont cure de moy.
80 Le monde ont plus qu’a demie,
Ou je n’ay ami n’amie,
Car partout taire me voy
Au pappe, au prince, au Roy.
Et Roys va mon ennemie
85 En l’euvangile et la loy
Taire de trestouz poins moy,
Par mençonge et flaterie.
Chascuns a chascun octrie
Son pechié, dont je me marroy.
90 S’uns Roys fait grant tyrannie,
Ou uns prince sa folie,
Mesprandre ne puet en soy.
Lors lui dira sa mesgnie :
« On craindra vo seignourie,
95 Vous faictes bien, par ma foy ! »
S’il est avers, j’apperçoy
Qu’om lui dit : « N’est pas sotie :
Il fait bon avoir de quoy. »
Se large est, il a l’ottroy
100 Que sa largesce l’escrie.
Tout fait bien, et si folie
Quant on le met en tel ploy.
Princes ne puelent mal faire,
Puis qu’oms me veult a eulx taire,
105 Ne pappes ne cardinaulx, 68b
Baillif, prevost, secretaire,
Gouverneur, seneschal, maire,
Arcevesque ne legaulx,
Tresoriers ne generaulx,
110 Conseilliers, officiaulx
Ne autre gent populaire,
Connestables, mareschaulx
Ne tous les estas plus haulx,
Qui se seulent contrefaire,
115 Eulx et le monde deffaire
Par leurs pechiéz communaulx.
Je ne voy crier ne braire
Nul pour moy ne mon affaire.
Chascuns doubte les travaulx.
120 Nul n’est qui m’ose retraire
Et qui ne me soit contraire.
Destruis sont tous mes vassaulx.
Saint Andrieu, qui tant fut baux,
Fut vis escorchiéz et chaux,
125 Pour moy nommer et complaire,
Et pour reprandre les maulx
Des pecheurs et leurs deffaulx.
Pierre et Poulz en eurent haire,
Et maint s’en firent detraire
130 Pour ce a queue de chevaulx.
Ainsi tous ceuls qui m’amerent
Et nommerent,
Et qui de fait me porterent
Par tout le temps ancien,
135 Les provinces conquesterent,
Et semerent
Les esglises qui apperent.
De la furent Crestien
Ly Paien.
140 Et encor le voit on bien 38c
Et comment ilz me doubterent,
Et laissierent,
Quant droictement m’esprouverent,
La loy qu’on li Arrien.
145 Les Roys l’eglise garderent,
Honourerent,
Et grant terre lui donnerent.
Les prelas firent tout bien.
Justice et les Roys regnerent.
150 Moult peserent
Les maulx ceuls qui gouvernerent.
Moult furent de fort merrien
Julien,
Valentin, Crispinien,
155 Qui par moy sanctifierent
Et finerent,
Quant du secle trespasserent,
Au regne celestien.
Adonc regnoit po de vices :
160 Benefices
Et tous seculiers offices
Estoient donnéz aux bons
Non pas aux coquars et nices.
Ne vendices
165 A ce temps n’orent offices
Dignitéz. Si nous dolons
Quant la vendue en sçavons.
Mais Dieux qui est tous propices
Telz malices
170 Et telz crueulz malefices
Vengera, bien le sçavons.
Car par telz cas impropices,
Li calices
De dolours se met es lices
175 Du monde que nous veons. 68a
Contre honeur regne avarices.
Ricalies,
Droit, raison, bonnes espices
Es fais des gens ne trouvons.
180 Telz promoveurs reprouvons,
Car de tous biens est esclipces
Es pelices,
Es grans seigneur, es delices,
Et es fourréz chaperons.
185 Justice, equité est morte.
Raison, charité ne porte
Nulz, pité ne congnoissance.
Des grans cours gardent la porte
Convoitise avec sa sorte,
190 Envie et Descongnoissance,
Car je voy qu’on y advance
Les chetis. Oultrecuidance
Leur promocion ennorte.
Luxure, Orgueil et Ventance
195 Font illec leur demourance.
Estat a qui mal rapporte.
Li saiges s’i desconforte,
Vaillans cuers ne s’i assorte,
Pas n’y doit avoir plaisance.
200 Platerie s’i depporte,
Et mentir par voie torte
Y a renom et chevance.
Envie tout mal rapporte.
Contre les bons est trop forte.
205 Elle y a grant aliance :
N’y ait vaillant cuer fiance.
Saiges preudoms ordonnance
Ne proufit laiens n’emporte.
Rien n’y vault ramentevance :
210 L’en n’y a d’eulx souvenance 69a
Ne que d’un chien qui avorte.
Qui a bien fait, si l’emporte,
Et n’y ait autre esperance.
Entre vous, gens de l’Eglise,
215 Ou est religion mise ?
Que dit la saincte Escripture ?
Qui vous a la loy aprise
De paresce et de faintise.
De vendre contre droiture
220 Chanonie et prelature,
Grosse dignité ou cure ?
Symon en fist la divise
Et Giézi. Quant je m’avise,
Ceuls font maint homme parjure.
225 Nul de vous riens ne me prise,
Ne de chose que divise
Ne de la loy n’avéz cure,
Car chascuns de vous procure
Avarice et convoitise.
230 L’indigne ordonnéz pour mise.
Du digne nul de vous cure.
Trop est Vaillance desmise.
Nulz au jour d’ui ne la prise,
Car maint nobles de nature
235 Font souvent desloial prise
Par toulte, par fole emprinse
Dessus mainte creature.
Certes plus messiet injure
A un noble homme et laidure
240 Qu’au villain, qui, a la bise,
Euvre aux champs, en sa chemise,
Pour sa povre nourreture.
Et plus doit estre reprinse
Foleur en noble comprinse.
245 En tous cas, car par mesure 69b
Nobles cuers ses faiz mesure.
Raison l’aprant et atise
A tout honeur. Quant g’i vise,
S’autrement fait, trop s’obscure.
250 Vous qui la guerre menéz,
Vous dampnéz,
Quant contre raison prenéz
Du peuple communement
Les biens et les rançonnéz :
255 Ne aléz.
Vaillance anciennement
Le faisoit bien autrement.
Voz subgiéz ne tourmentéz,
Ne fouléz :
260 Menéz les courtoisement,
Vos ennemis, durement,
Tant qu’au dessus en venéz.
Trop douvement les traictiéz,
Et tenéz
265 Voz subgiéz crueusement,
Qui font le soustenement
Des faiz que vous emprenéz.
Ainsis vous deshonouréz,
Il appert tout clerement.
270 Juges qui les loys gardéz,
Regardéz
Que larronciaulx ne pandéz,
Et jugiéz la povre gent.
Les grans larrons enclinéz
275 Et prandre ne les oséz :
Si oséz
Ne seriéz, ne vo sergent.
Ceuls font le peuple indigent.
Justice dissimuléz,
280 Et vouléz 69c
Pugnir le povre innocent,
Et le coupable absolent
Encontre raison aléz.
Vous toléz, vous rapinéz :
285 Adviséz
De Dieu le hault jugement.
Jugiéz droiturierement.
La balance droit tenéz,
S’autrement vous maintenéz,
290 Vous mourréz mauvaisement.
Conseillier, je me merveil
Comment je dors et sommeil,
Et ne m’avéz resveillee.
Bien sçay qu’en vous pas ne veil,
295 Ains me fistes appareil
Que par vous fusse trouvee :
Vous avéz langue doree
A l’argent, non au droit, l’eil.
Mainte cause enlangouree
300 Avec pour l’or savoiree,
Et plaidé de grant acueil
Contre raison et mon vueil :
Votre ame en sera dampnee.
Et tu, peuple plain d’orgueil,
305 Comment es tu en esveil
D’avoir villaine pensee
A ton seigneur ? Je m’en dueil.
Tu ne doiz passer ton sueil,
Fors pour faire ta journee.
310 Soit la terre labourre
Et la revenue en cueil,
A Dieu ta disme paiee,
Obeissance donnee
Au prince : je le conseil.
315 Ne fay rien sanz bons conseil. 69d
De toy soit l’Eglise amee.
Puis que nulz homs ne m’acueille
Ne recueille
En terre, li frons me moille.
320 De larmes le font moillier
My œil, qui ne font qu’eillier,
La veue me trouble et breille.
Plus que fueille
Je tremble, et vif a dangier.
325 Ou ciel m’en vois habergier,
La seray blanche et vermeille,
Pou m’esveille.
Plus vault le cri de corneille
Que ne fait tout mon crier.
330 Sanz moy voy tout detrier
Et perir par ma dorveille.
Tout se gaste et entorteille
Quant j’oreille,
Je sens la fin approuchier
335 Du monde, qui ne m’a chier,
Qui de moy se destorteille.
Ci fine le lay de verité
