Chançon royal 139 : Si comme on treuve en Bible escript (MCCCLXIV)
Chançon royal de cinq vers, des eages du monde
Si comme on treuve en Bible escript,
Depuis que fu creéz Adams
Jusqu’au diluge ou Noué mit
En l’arche sa femme et enfans,
5 Ot adonc quatorze [cens] ans
Que monde ot renovacion :
A tel temps grant mutacion
S’est faicte et par experience,
Qui est en ma conclusion
10 Maistresse de toute science.
Et de Noué, si comme on lit,
Ce nombre complect, Abrahams
Fut nouvellement circoncit
Par la loy, puis fut David grans,
15 Vivent Saul com[1] roy vacquans,
Et a tel terminacion
D’ans et de generacion
Regna, suient tel consequence,
Qui est en ma conclusion
20 Maistresse de toute science.
A tel temps fut le peuple aflict,
Ces generacions courans,
De Jherusalem, puis Davit,
En Babiloine tansmigrans,
25 .Xiiiic. ans decourans.
Aprés vint l’incarnacion 446c
Du filz Dieu et redempcion
Suient cette perseverence,
Qui est en ma conclusion
30 Maistresse de toute science.
Aprés, le filz Dieu Jhesucrit,
Partout ses apostres preschans,
Qui tant de roayumes conquit,
Depuis sa mort resuscitans,
35 En son nom treple baptizans,
Loy de grace et salvacion
Nous donna. Par sa passion
Dudit nombre fist demoustrance,
Qui est en ma conclusion
40 Maistresse de toute science.
Or requeillons ce que j’ay dit,
Les temps et les eages coulans,
Qui par .vi. foiz sans contredit
Ont tousjours esté renovans :
45 Par ce estre pouons concluans
Depuis la resurrection
De Crist tel prosecucion
De temps ou depuis sa naissance,
Qui est en ma conclusion
50 Maistresse de toute science.
L’envoy
Princes, ly mondes s’envieillit,
De jour en jour anientit,
Septem milliaire[2] s’avance :
Chascuns en couvoitise vit,
55 La foy fault, l’eglise perit,
[…][3]
Approuchans la finicion
Du monde en ceste demoustrance,
Qui est en ma conclusion
60 Maistresse de toute science. 446d
[1] Ms. comme
[2] Note de Raynaud : L’année 1400, venant sept mille ans après la date attribuée à la création du monde (5600 av. J.-C.).
[3] Vers manquant
