Chançon royal 138 : A tous les roys, a l’université (MCCCCXLV)
Autre Balade[1] des .iiii. villains pechiéz qui regnent au jour d’uy
A tous les roys, a l’université
De tous princes, a toute creature
Fait Memoire sçavoir pour verité
.iiii. pechiéz plains de toute laidure,
5 Que Dieu het trop et qui les a en cure :
Destruis en son gent, villes et pais.
L’un est Orgueil dont Lucifer hais,
Angle jadis de Dieu, fut trebuchiéz
En fons d’enfer, noirs, hideux, esbahis :
10 Or nous gardons de ces .iiii. pechiéz !
Le second est par Adam recité
Du fruit veé dont il fist la morsure,
Et Eve aussi par le serpent creté :
Linaige humain en soufrit grief pointure.
15 Le tiers pechié est vil, contre nature,
Dont Dieux fondit les .v. citéz jadis.
[…][2]
Le monde en fut par deluge noiéz
Du temps Noé, qui n’en fut pas repris :
20 Or nous gardons de ces .iiii. pechiéz !
Le quart est plains de toute iniquité ;
En toute loy Dieu offence et injure,
C’est d’enquerir contre sa voulenté
Chose qui soit par sort, par voie obscure,
25 D’ydolatrer contre saincte Escripture
Et d’invoquer les noms des Ennemis :
Saul en fut a destrucion mis. 441a
Pompee en fut mors, fuitis et chaciéz
En Thessalle, puis en Egipte occis :
30 Or nous gardons de ces .iiii. pechiéz !
Peuple Israel, qui en adversité
Soubz Pharaon ot mainte peine dure,
Honoura Dieu tant qu’il en ot pitié
Et le mena en joieuse pasture,
35 Par Moysés, hors de peine et d’ordure,
En la terre qu’il leur avoir promis :
Par .xl. ans sont de manne remplis.
Eulx habondans, fut li veaulx dreciéz :
Ydolatrans lors en furent pugnis.
40 Or nous gardons de ces .iii. pechiéz !
Et des autres ! Car c’est horribleté
Du teps qui court, des maulx oultre mesure,
Comment on est a mal croire ahurté :
Legierement nulz de la foy ne cure,
45 L’ire de Dieu chascun quiert et procure,
Et se par l’un des pechiéz desus dis
Fut li peuples condempnez et peris,
Qui des .iiii. est sousprins et entechiéz
Moult doit doubter qu’en ces maulx ne soit pris :
50 Or nous gardons de ces .iiii. pechiéz !
L’envoy
Princes, laissons, pour gaingnier paradis,
Tous les pechiéz et les maulx dessus dis.
En un seul Dieu soient noz cuers fichiéz,
Repentons nous, si nous avons mesprins,
55 Et a tel fin que ne soions sousprins :
Or nous gardons de ces .iiii. pechiéz !
[1] Raynaud corrige en Chançon royal
[2] Vers manquant
