Chançon royal 136 : Les dieux des Rommains, des paiens (MCCCCXXIX)

Autre Balade[1] des Dieux des Rommains

                        Les dieux des Rommains, des paiens,                                               433c
                        Leurs sacrifices, mainte ydole,
                        Leurs noms, diables[2] enclos laliens
                        Et mainte invocacion fole,
5                      Leur respons par double parole
                        Les ont en partie destruis,
                        Et fole creance les Juifs.
                        Maint crestien en sa loy erre,
                        Tenens, disans, dont marris suys :
10                    Or et argent sont dieux en terre.
                       
                        Ces deux sont les gens attrayens
                        Par couvoitise qui affole
                        La loy et fait les sos croyens
                        Et le cisme dont l’en parole.
15                    Chascun les quiert, baise et acole
                        En ydolatrant, et si truys
                        Que se d’or avoient cent muys,
                        Or sur or et argent requerre
                        Veulent encor, tant sont seduis :
20                    Or et argent sont dieux en terre.
                       
                        Ceulx sont faiz par divers moyens,
                        Mis es temples comme carole
                        Et aouréz des crestiens
                        Contre loy. C’est creance mole
25                    Qu’euvre des maulx[3] d’omme nous tole
                        L’amour Dieu qui nous a instruit[4]
                        A sa forme et achatéz puis
                        D’enfer ou il nous ala querre,
                        Dont nous querrons la porte et l’uis :
30                    Or et argent sont dieux en terre.
                       
                        Princes, prelas grans et moyens,                                                       433d
                        Maistres de la divine escole,
                        Clers, conseilliers, praticiens,
                        Cilz qui porte la grant estole,
35                    Chascun aces dieux court et vole :
                        Ceuls doivent honeur et deduis,
                        Ceuls font ou ciel les sieges vuis,
                        Ceuls font contemps, haine et guerre
                        Sa dessoubz de jours et de nuis :
40                    Or et argent sont dieux en terre.
                       
                        Las ! com faulx dieux et decepvens,
                        Qui tiennent prins en leur geole
                        Par couvoitise maintes gens,
                        Que diable[5] endort a sa viole !
45                    Lors les brise comme fiole
                        Par mort soudaine, et en son puis,
                        Plains de pechiéz, sont ars et cuis
                        Et dampnéz pour tel mettre acquerre.
                        Plus ne dient en leurs annuys[6].
50                    Or et argent sont dieux en terre.
                       
                        L’envoy
                       
                        Princes, qu’or fust devenu cole,
                        Esturjon, chien de mer ou sole,
                        Tel maniere, dont chascun erre,
                        Qui nous fait plus pesant que mole,
55                    Tant que cessast la parabole :
                        Or et argent sont dieux en terre.

[1] Raynaud corrige en Chançon royal

[2] Ms. les diables

[3] Raynaud corrige en mains

[4] Raynaud corrige en instruis

[5] Ms. diables

[6] Ms. leur annuye