Chançon royal 135 : O Saint Lambert, le Chasteler, Coucy (MCCCLXVI)
Autre Balade faisant mencion de la mort de Monseigneur de Coucy
O Saint Lambert, le Chasteler, Coucy,
Le Fere, Oisy, Gercies, Saint Gombain,
Marle, plouréz, et le chastel d’Acy,
Le bon seigneur qui vous tint en sa main
5 Et qui si bien servy son souverain
En pluseurs lieux a grant chevalerie.
Tout noble cuer qui [connut] s’arme, crie
La mort et fin d’Enguerrant le baron,
Qui trespassa pour la foy en Turquie.
10 Prions a Dieu qu’il li fasse pardon !
Car a son temps fut appert et joli,
Saige, puissant, de grant larfesse plain,
Beau chevalier, bien traveillant aussi.
Sanz nul repos hostel tin large et sain 383c
15 De chevaliers qu’il avoit soir et main
Avecques lui de s’ordre et compaignie.
Preux et hardiz, un temps en Lombardie
Arreste prinst, la cité de renon,
Et par avant le craint Milan, Pavie.
20 Prions a Dieu qu’il lui face pardon !
A son dessus ot des vaincus mercy,
En tous estas fut commun et mondain,
Pour sa douçour maint franc cuer le servy,
Tout gouvernoit sanz traveillier en vain.
25 Osteriche sentit bien son levain,
Flandres, Guerle, Savone et Barbarie,
La frontiere de Calais, Picardie,
D’Angolesme, de Guyenne environ :
Or est tout cheu en femme son amie[1],
30 Prions a Dieu qu’il lui face pardon !
Maintes gens ont pour li le cuer nerci,
Car ses armes n’ont point d’omme prochain
Qui les porte pour representer li,
[Et] mortes sont, dont trop fort me complain.
35 Et diviser couvendra le terrien[2]
Estrangement et changier seignourie.
Terre qui fus si doucement nourrie,
Clergé, nobles, peuples, plouréz le non
Du bon seigneur qui tant ot noble vie :
40 Prions a Dieu qu’il lui face pardon !
Et a tous ceuls qui la furent occy
Dessoubz Basac le Turc, par cas soudain,
Dont maint seigneur et noble homme pery.
L’an mil .ccc. .iiiixx. pour certain,
45 Dis et set ans adjouste. A ce mehain
Mourut li bers de male maladie
Tout prinsonnier. Ses os en l’abbaye
De Nognet sont en tombel riche et bon 383d
Dessoubz Coucy o son anceserie :
50 Prions a Dieu qu’il lui face pardon !
L’envoy
Prince, pour dieu, en la terre chierie
De Coussioys et de la baronnie,
Ou les chasteaulx sont de si grant façon,
Ne recevéz nul qui vous contrarie.
55 Terre ne soit de prodomme perie :
Prions a Dieu qu’il lui face pardon !
[1] Raynaud corrige en sousagie
[2] Raynaud corrige en terrain