Chançon royal 134 : Juenes de sens et po puissans de corps (MCCCLIII)
Juenes de sens et po puissans de corps, 368b
Pupilles d’ans, me plains et [me] guermente,
Grans en renom et petis en effors,
Povres d’avoir, plains de guerre et tourmente,
5 Garniz d’estat, appeticiéz de rente,
Sanz pere avoir et sanz mere piteuse,
Roys sanz amis, en tel vie dolente,
Secouréz moy, Vierge tresprecieuse !
De vo garde ne doivent estre hors
10 Ly orphenin, ains estes leur attente,
Mere en pité, et tous leurs reconfors.
Si vous suppli que de vo grace sente,
Car au jour d’uy n’est parent ne parente,
N’amour n’a lieu, fors vie couvoiteuse.
15 Pour un vray cuer, faintis en treuve trente :
Secouréz moi, Vierge tresprecieuse !
Mon peuple est dur et mes ennemis fors
Qui m’envahist, et Prouesse s’absente
De moy aidier et ne quiert que tresors,
20 Et lascheté tient mes gens en sa sente.
Fortune ainsi tous maulx me represente.
Avise toy, gent jadis vertueuse,
Ou tout se pert, c’est ce qui me tourmente :
Secouréz moy, Vierge tresprecieuse !
25 Ly cerfs legiers, signéz de .xxx. cors,
Ne puet encor esprouver sa jouvente,
Et li mastins couvoiteux, vilz et ors,
A tout ravir n’a pas la gueule lente,
Les brebiz tond et escorche et cravente,
30 Et le cenglier fiert de sa dent crueuse.
Deux paistres sont pour estreper mon ente.
Secouréz moy, Vierge tresprecieuse !
Mais en brief temps doit venir mes confors :
Ly cerfs legiers, qui ses cornes presente, 368c
35 Et puissans yert tant que par ses bons pors
Et par son hurt la vermine pulente,
Mastin, sangler, fera es corps tel fente
Que memoire yert de leur fin dolereuse.
Un seul pastour sera, tel est m’entente :
40 Secouréz moy, Vierge tresprecieuse !
L’envoy
Prince, enfes est plus qu’a la moitié mors
Quant ses pais est garniz de descors,
Et ly regent mainent vie envieuse.
Regne se pert par leur folie lors,
45 La fault amour. Pité, las ! pour moy dors :
Secouréz moy, Vierge tresprecieuse !