Chançon royal 133 : Puis que la loy permet en mariage (MCCCXLII)

Autre Balade[1] de l’unité de .ii. personnes estans en mariage

                        Puis que la loy permet en mariage
                        Deux personnes estre en une unité
                        Tous d’un acourt[2] et d’un ferme courage,
                        D’un bien, d’un mal et d’une affinité,
5                      Il doit entr’eulx avoir fidelité
                                    Sanz changier aucunement.
                        Car mariéz qui autre femme prant
                        Est escheléz selon le droit des cours.
                        Dame a ami qui fait un autre amant,                                                365a
10                    Doit estre mise en l’eschielle d’amours.

                        Car se li homs est mis par son oultrage
                        En l’eschielle par son iniquité,
                        Et par mentir a dueil et a hontaige,
                        Et que son fait lui est la recité,
15                    Ou il reçoit moult de chetiveté,
                                    Pour femme secondement
                        On ne scet pas [ne] pour quoy ne comment
                        Qu’om li a fait, ne les dolereux tours.
                        Mais aussi bien une amie qui ment
20                    Doit estre mise en l’eschielle d’amours.

                        Homs mariéz vit en trop grief servaige,
                        Et un chascun quiert franche voulenté,
                        Comme contrains promet. Or dit le sage
                        Que li franc cuer qui sont entalenté
25                    De vray desir, en doulz plour [a]lenté,
                                    D’eulx amer parfaictement
                        Sanz contrainte, fors de leur mouvement,
                        Se mesprannent, s’ilz[3] changent le rebours.
                        Dont la dame qui le fait ensement
30                    Doit estre mise en l’eschielle d’amours.

                        Ceste eschielle n’estoit pas en usaige
                        Ou temps jadis que regnoit loyauté
                        Pour ce qu’oneur, amour et vasselaige,
                        Secret deduit, plaisance et honnesté
35                    Estoient si es nobles cuers enté
                                    Que l’en vivoit liement
                        Et s’amoit l’en tresamoureusement,
                        Et faisoit on joustes, festes, estours.
                        Autrement va. Dame qui va changant
40                    Doit estre mise en l’eschielle d’amours.

                        Pour ce couvient que je soye messaige
                        De Jupiter qui des siens a pité,
                        Et de Venus qui mains maulx assouage,                                           365b
                        Que qui fera en maours fausseté
45                    Ne changement qu’il soit executé
                        Desormais crueusement,
                        Car ilz ont fait cest establissement
                        Pour fausseté qui regne et a le cours :
                        S’amis deux a femme, a leur jugement
50                    Doit estre mise en l’eschielle d’amours.

                        L’envoy

                        Prince, dame qui a cuer tant volage
                        Que deux amis veult tenir en [sa] cage
                        Doit plus estre huee que loups n’ours.
                        Elle deçoit chascun par son langaige.
55                    Celle qui fait aux bonnes tel hontaige
                        Doit estre mise en l’eschielle d’amours.

[1] Raynaud corrige en Chançon royal

[2] Raynaud corrige en acort

[3] Ms. moult s’ilz