Chançon royal 132 : En pais ne suy pas pour moy (MCCCXXV)
Chançon royal
En pais ne suy pas pour moy,
Mais en tout contre ma nature.
Noy, gelee et froit temps y voy,
Vivres contre ma nourreture,
5 En tous temps puour et laidure,
Couchier, mangier, comme pourceaulx,
Douze en un plat saléz morseaulx,
A table ronde ou escarrie.
Et tuit buvans a deux vesseaulx,
10 Par ma foy, c’est une orde vie !
Chascuns ne gist mie a par soy,
Mais deux et deux en chambre obscure,
Ou le plus souvent troy et troy 359d
En un seul lit, a l’aventure,
15 Ou dix. Liz a sanz couverture,
Ort drap et puces de Citiaulx.
Cottes, chaperons et mentiaulx
Sont plus enpluméz c’une pye.
Chascun jour les fault faire biaux.
20 Par ma foy, c’est une orde vie !
De la char salee recroy
De porc et de buef, qui est dure,
De la cervoise que je boy,
Du poisson dont je n’eusse cure,
25 D’un ort brouet qu’om me procure,
De poivre, miel[1], pommes, poreaulx[2],
De coulz blans pourris, de naviaulx,
Pain salé, moustarde adoucie,
Dont j’ay touz rompyz les boyaulx :
30 Par ma foy, c’est une orde vie !
En l’estuve, et fust filz d’un roy,
Fault tout homme prandre pasture
Sanz pouoir mangier en recoy,
Tel viande que l’oste cure
35 A son heure, sanz nape pure,
Mais[3] crasse et noire que housiaux.
Et laver, comme on fait drapiaux,
En un bacin, maistre et mesgnie,
Fault plain d’yaue, chascun entr’iaux.
40 Par ma foy, c’est une orde vie !
Dieux scet le service et l’arroy
Des mes, et les maulx que j’endure.
Aprés disner, se du vin boy,
Tantost fault paier, c’est droiture.
45 Onques ne vi plus grant ordure
Que de mangier en ces plateaux
De fustaille, ou chascuns com veaux 360a
A sa barbe et sa main brouillie,
Et laisse[4] mailles et mereaulx.
50 Par ma foy, c’est une orde vie !
L’envoy
Prince, en pais n’a point de loy[5]
De Behaingne, mais apperçoy
Sur les champs toute roberie.
Nulz n’y ose aler sanz convoy,
55 Qui ne soit prins, dont je marvoy.
Par ma foy, c’est une orde vie !
[1] Ms. de miel
[2] Raynaud corrige en poriaulx
[3] Ms. mais que
[4] Ms. laissie
[5] Ms. lay
