Chançon royal 131 : J’ay en dormant, ce m’a semblé (MCCXCIII)
Chançon royal
J’ay en dormant, ce m’a semblé, 351c
Veu merveilleuse vision
D’un college noir et troublé
Qui estoit a collacion,
5 Requerans a pugnicion
Qu’elle fist des mauvais justice,
Mais elle dist que tant de vice
Sont partout qu’a paine scet voie
Trover comment on les pugnice.
10 Pour ce, fault que Dieux y pourvoye.
― Les uns, fait elle, ont trop emblé,
Tué, fait fornicacion.
Les autres se sont assemblé
Au temple et fait polucion,
15 Mys le peuple a destruction.
Autre ont polu le sacrifice
Divin, corrumpu leur office,
Vendu dignitéz pour monnoye,
Estat, prebende et benefice.
20 Pour ce, fault que Dieux y pourvoie.
N’a ja long temps terre tremblé,
De peuple esté grant mocion,
Guerre en mains lieux, faulte de blé,
Mort soudaine, inundacion,
25 Feux boutéz par destruction,
Tempeste du ciel, maint esclipce
De souleil, ne nul ne justice,
Maint signe horrible, et toutevoie
Chascun croist en son malefice ?
30 Pour ce, fault que Dieux y pourvoie.
Car maint mal me sont recelé
Tout par dissimulacion,
Le bien de Justice est foulé
Qui ne fait execuxion
35 Des mauvais, car s’entencion 351d
Est corrumpur d’avarice.
Et que feray je qui suy nice,
Quant Justice et Raison desvoye ?
De jour en jour croist en malice.
40 Pour ce, fault queDieu y pourvoye.
Soient ly mauvais ravalé
On nous tous en perdicion,
Dont nostre enfer yert repeuplé,
Pour avoir consolacion.
45 Dist lors la noire region :
― Ne noz paines ou chascun glice
Infernaulx par mauvais delice
Dont nous esperons avoir joie,
Trop [s]uivent partout avarice.
50 Pour ce, faut[1] que Dieux y pourvoie.
L’envoy
Prince, aprés qu’ainsi ont parlé,
Se sont en enfer avalé,
En horrigles cris. Lors m’effroie.
Esveillans me tournay d’un lé :
55 Tuit sommes mort et affolé,
Pour ce, fault que Dieux y pourvoie.
[1] Ms. faut il