Chançon royal 126 : Liber generacionis (MCLXVI)
Balade que Eustace fist sur Liber Generacionis etc.
Liber generacionis
Est au jour d’ui bien en saison,
Car l’en voit pluseurs definis[1]
Dont l’en ne scet dire leur nom.
5 Qui fuit Sadoch et Naason ?
Qui est cilz au bleu chaperon ?
L’un respont qu’il est receveur,
Et l’autre dit contreroleur, 310a
Qui fuit Naon ? grenetier,
10 Qui fut Natham ? imposteur :
Tout va ce que devant derrier.
Qui fuit Boos li esbahis ?
Sergens de l’imposicion.
Qui fuit Eber li hais ?
15 Generaulx en conclusion.
Qui fut Pharés ? l’election
Ci vient, la rusmigracion,
Et Arphaxat fut fouageur.
Qui fut Ragam ? executeur.
20 Et Jacob ? le clerc du papier.
Qui fut Maleth ? reformateur.
Tout va ce que devant derrier.
Les temps ne sont pas touz onnis
En ceste generacion.
25 Enoch a perdu ses habis.
Je n’y treuve pas Salemon.
Aram quiert tout a son ramon,
Qui rien n’y veult laissier de bon.
A pié trop tent li chevaucheur.
30 Telz fu pran qui se fait donneur,
Populus karolus a chier.
De cuer hautain fait orateur :
Tout va ce que devant derrier.
Qui fut Joseph ? qui fut David ?
35 Qu’est devenu Pymallion ?
Mathussalé est enviellis.
Charpentier ne veult ne maçon,
Car ilz vendent trop leur façon.
Esaü revient a parçon
40 Qui contr’eulx se fait demandeur.
Hely fut de pierres vendeur,
Mais plus ne sçaroit l’or touchier,
Car il y a nouveau fondeur : 310b
Tout va ce que devant derrier.
45 Voire pour aucuns qui jadis
N’aloient pas sanz compaignon,
Qui devenus sont si hardis
Que ilz vont seulz, vueillent ou non,
Et n’ont banniere ne pannon.
50 Helas ! et que leur demand’on ?
Qu[e] ilz soient restitueur.
Zerobobel est assuseur.
Achas les fait vivre a dangier.
Baraté sont li barateur.
55 Tout va ce que devant derrier.
L’envoy
Prince, je di que de raison
Orgueil ne puet durer foison
N’avarice, sanz trebuchier.
Pour ce, impositeur et maçon
Prangnent cy leur conclusion :
Tout va ce que devant derrier.
[1] Ms. gens definis
